BANKA E SHQIPËRISË - Mbikëqyrëse dhe Rregullatore

Si pjesë të mandatit të saj për të siguruar një sistem bankar të shëndoshë, Banka e Shqipërisë mbikëqyr dhe rregullon aktivitetin e bankave dhe të institucioneve të vendit që kryejnë aktivitet bankar.

Si rregullator, Banka e Shqipërisë harton rregulla, për mënyrën e krijimit të bankave dhe të institucioneve që veprojnë si banka, si dhe licencon aktivitetin e tyre. Si mbikëqyrës, Banka e Shqipërisë ndjek, shqyrton dhe monitoron aktivitetin e këtyre institucioneve, për të siguruar që ato të jenë të sigurta dhe që veprojnë në përputhje me ligjet dhe me rregullat në fuqi.

Banka e Shqipërisë, gjithashtu, siguron veprimtarinë në interes të publikut të bankave, duke trajtuar aplikimet në rastet kur një bankë kërkon të blejë një bankë tjetër apo kur një bankë kërkon të kryejë aktivitet jobankar. Në hartimin e rregullave të tillë, Banka merr në konsideratë faktin se si transaksione të tilla ndikojnë konkurrencën dhe interesat e publikut, duke siguruar që klientët trajtohen në mënyrë të barabartë dhe të ndershme.

Një tjetër mënyrë se si Banka e Shqipërisë ndihmon në krijmin e një sistemi bankar të shëndoshë, është funksioni i saj si "huadhënës i fundit në radhë". Kështu, një bankë apo një institucion financiar që ka tërheqje të mëdha të depozitave nga klientët, mund të kërkojë hua nga Banka e Shqipërisë kur nuk mundet të sigurojë hua nga bankat e tjera. Kjo hua e Bankës së Shqipërisë, jo vetëm që e ndihmon bankën të kapërcejë vështirësitë e përkohshme që ajo përballon, por më e rëndësishmja, nuk lejon që problemet të përhapen nga një bankë tek një tjetër. Përqindja e interesit që aplikohet në këto raste quhet "përqindja e kredisë lombard".