Banka qendrore

 

Çfarë është Raporti mbi Kredimarrësin?
		Raporti mbi kredimarrësin është një dokument i gjeneruar nga sistemi i Regjistrit të Kredive dhe përmban të dhëna/informacion mbi identitetin e kredimarrësit dhe gjendjen e tij të kreditit në sistemin bankar dhe atë financiar. Raporti mbi kredimarrësin lëshohet pranë Bankës së Shqipërisë pas kryerjes së kërkesës për kredi nga një person fizik apo juridik. Subjekti kredidhënës gjatë shqyrtimit të aplikimit për kredi, kërkon informacion për çdo aplikant në Regjistrin e Kredive dhe lexon raportin e tij të kredimarrësit.

 

Regjistri i kredive
		Mundësia e kreditimit është lokomotiva që tërheq zhvillimin ekonomik të një vendi. Ajo i lejon çdo personi “të blejë tani dhe të paguajë më vonë”, duke u bazuar mbi të ardhurat e momentit dhe mbi ato të mëvonshme. Të blesh tani, në vend që të presësh deri sa t’i kesh paratë për të blerë mallra dhe shërbime të ndryshme (si për shembull, televizor, makinë, shtëpi apo për të paguar pushimet ose shkollimin e fëmijëve) krijon një kërkesë të menjëhershme për këto produkte.

 

7 mësime të shkurtra për paranë
		Në ditët e sotme, marrëdhënia me paranë fillon që në moshë të vogël. Për të shoqëruar përvojat e para të lexuesit të vogël me dije, Banka e Shqipërisë ka përgatitur enkas për të një përmbledhje të shkurtër e të thjeshtë që siguron njohuritë kryesore mbi historinë dhe funksionet e parasë. Nga ana tjetër, mësimet për paranë prezantojnë edhe karakteristikat e kartëmonedhave dhe monedhave me kurs ligjor në vendin tonë, elementet e sigurisë të prerjeve të ndryshme dhe disa këshilla për mirëmbajtjen e tyre.

 

Simbolika e kartëmonedhave shqiptare
		Kartëmonedhat e një vendi janë pjesë e identitetit kombëtar të tij. Kjo broshurë ju njeh  me personalitetet që janë kthyer në imazhe të parasë shqiptare, si dhe me simbolikën që shoqëron secilën prej kartëmonedhave aktualisht në qarkullim.

 

Rrugëtimi i parasë
		Banka e Shqipërisë ka të drejtën ekskluzive dhe është emetuesja e vetme e kartëmonedhës dhe monedhës kombëtare që ka kurs ligjor brenda territorit të Republikës së Shqipërisë. Ajo përcakton format, masat, peshat, modelin dhe karakteristikat e tjera të kartëmonedhave dhe monedhave metalike shqiptare që kanë kurs ligjor.

 

Banka e Shqipërisë - Banka jonë qendrore (ribotim, 2010)
		Nëpërmjet një panorame të përgjithshme të historisë, strukturës dhe funksioneve të bankës qendrore, kjo broshurë i prezanton publikut Bankën e Shqipërisë. Si e realizon Banka e Shqipërisë objektivin e stabilitetit të çmimeve, si kontribuon ajo, me politikat e saj, në zhvillimin ekonomik dhe në mirëqenien e vendit dhe të tjera si këto pyetje, do t'u jepet përgjigje duke shfletuar këtë botim.

 

Bonot e Thesarit
		Bonot e thesarit janë një instrument borxhi me maturim deri në një vit, që emetohen dhe garantohen nga Qeveria e Republikës së Shqipërisë. Për të njohur më mirë këtë instrument, procedurat e pjesëmarrjes në ankandet ku tregtohen bonot e thesarit dhe  përparësitë që kjo formë investimi ofron, ju ftojmë të lexoni broshurën.

 

Edukimi - sfida e re e Bankës së Shqipërisë
		Kjo broshurë përmbledh me pak fjalë të gjitha aktivitetet edukuese që Banka e Shqipërisë ka kryer për periudhën 2007-2008. E ilustruar me mjaft foto, ajo synon të krijojë një memorie edhe vizuale tek publiku i gjerë, rreth punës që Banka ka bërë në këtë fushë të rëndësishme. Meqenëse i dedikohet publikut të përgjithshëm ajo është shkruar në gjuhë të thjeshtë.

 

Sistemi i Pagesave  (ripunuar)
		Për të përfituar produktet apo shërbimet për të cilat kemi nevojë, nevojitet të bëjmë një transferim vlerash monetare në favor të shitësit ose e thënë ndryshe, të kryejmë një pagesë. Kjo broshurë na ndihmon të njohim llojet e ndryshme të instrumenteve të pagesave dhe sistemin shqiptar të pagesave, i cili funksionon si “lubrifikant” për lëvizjen e tyre, duke siguruar arteriet për zhvillimin e tregjeve dhe të aktiviteteve të tjera ekonomike në vend.

 

Instrumentet e Politikës Monetare të Bankës së Shqipërisë dhe procedurat për realizimin e tyre  (ribotim)
		Një broshurë që shpjegon kuadrin operacional të Bankës së Shqipërisë dhe mënyrën e funksionimit të tij. Duke qenë vijim edhe i një tjetër botimi për këtë qëllim, ajo është përpjekur të shpjegojë më gjerësisht dhe me një gjuhë sa më të kuptuar nga publiku se si funksionon dhe si është i rregulluar ky kuadër.

 

Godina e Bankës së Shqipërisë
		Kjo broshurë bën një përshkrim të godinës 70-vjeçare të Bankës së Shqipërisë, historisë së ndërtimit të saj, jetës dhe punës së arkitektit që e ka projektuar. E vendosur në qendër të Tiranës, ajo është një ndër ndërtesat simbol të kryeqytetit. Së shpejti, ajo do të jetë objekt i një rregullimi e rinovimi të përgjithshëm, që do të synojë ta shndërrojë atë në një ambient pune të përshtatshëm e komod për personelin e Bankës, pa cënuar identitetin dhe vlerat e saj arkitekturore.

 

ABC-ja e normave të interesit
		Çfarë janë normat e interesit dhe pse luhaten ato? Kur është momenti i duhur për të investuar, kur duhet kursyer, dhe në ç'moment është më e këshillueshme të marrim një kredi? Të gjitha këtyre pyetjeve, i jep përgjigje kjo broshurë, e cila tregon se si normat e interesit kanë fuqinë të ndikojnë jetët e njerëzve. Për të shkuar akoma dhe më larg, duke ndikuar vendimet ekonomike që individët e ndryshëm ndërmarrin, normat e interesit shërbejnë edhe si faktor përcaktues për investimet në nivelin e përgjithshëm të ekonomisë.

 

Në pritje të regjistrit të kredive
		Duke pritur që edhe Shqipëria të ketë Regjistrin e saj të parë të Kredive, Banka e Shqipërisë publikon këtë broshurë, e cila synon t'i shpjegojë publikut se çfarë është një regjistër kredie, si funksionon ai, ç'lloj informacioni përmban dhe mbi të gjitha përse krijimi i tij është një domosdoshmëri për situatën aktuale shqiptare.

 

Departamentet në Bankën e Shqipërisë
		"Departamentet në Bankën e Shqipërisë" i ribotuar, ju sjell informacion të rinovuar mbi disa ndryshime të bëra në Bankën e Shqipërisë, ndërkohë që risjell në vëmendjen e të gjithëve, një prezantim të bërë edhe më parë mbi detyrat dhe funksionet tashmë të konsoliduara, të pjesës tjetër të Bankës.

 

Ç'është për ju stabiliteti i çmimeve?
		Kjo broshurë përshkruan në mënyrë të thjeshtë dhe të detajuar qëndrueshmërinë e çmimeve dhe rëndësinë e saj për ekonominë e një vendi. Në tekst, do të gjeni shembuj të cilët janë marrë nga jeta e përditshme. Kjo broshurë shpjegon edhe konceptet e inflacionit e të deflacionit dhe ndërlikimet që ato sjellin në jetën e secilit.

 

Historia e akullores (ribotim)		Të flasim thjesht për inflacionin (ribotim)		Inflacioni: Çfarë duhet të dimë për të
Janë 3 broshura të cilat synojnë të shpjegojnë me një gjuhë të thjeshtë se ç’është inflacioni dhe pse flitet kaq shumë për të. Të konceptuara si një seri broshurash të karakterit edukativ, ato i drejtohen shtresave të ndryshme të publikut, që fillojnë me nxënësit e shkollave 9 - vjeçare (Historia e Akullores) vazhdojnë me ata më të rriturit (Të flasim thjesht për inflacionin) për të dhënë një shpjegim më profesional tek broshura e fundit. Në funksion të kësaj ideje, dy broshurat e para janë edhe të ilustruara.

 

Sistemi i Pagesave
		Për herë të parë synon të prezantojë thjesht para publikut shqiptar cilat janë mjetet e pagesave, ç'është një sistem pagesash, cilët janë përbërësit e tij. Gjithashtu, kjo broshurë jep edhe një pamje të sistemit tonë të pagesave dhe të rolit të Bankës së Shqipërisë në këtë sistem. Botimi është përgatitur vetëm në gjuhën shqipe. Një fletëpalosje, në shqip dhe anglisht, është veçuar nga broshura me të njëjtin titull, duke synuar të nënvizojë në publik se çfarë përfaqëson sistemi i pagesave në vendin tonë, shkallën e zhvillimit të tij dhe cili është roli i Bankës sonë Qendrore në këtë sistem.

 

Pak fjalë për Bankën Qendrore
		Broshurë e ilustruar me informacion të përgjithshëm për Bankën Qendrore dhe aktivitetin e saj. Publikuar vetëm në shqip.

 

Departamentet e Bankës së Shqipërisë
		Roli, detyrat dhe funksionet e departamenteve në Bankën e Shqipërisë. Objektivat dhe arritjet e tyre më të spikatura.

 

Bonot e thesarit. Si t’i njohim ne ato?
		Është një nga publikimet më të dobishme të këtij lloji. E shkruar në shqip dhe anglisht, publiku e gjeti shumë të përshtatshme për të plotësuar njohuritë e tij rreth bonove të thesarit, mënyrës së investimit në to dhe përparësive të tjera që ofrojnë.

 

Instrumentet e Politikës Monetare
		Një broshurë e ilustruar, që jep informacion të thjeshtuar mbi instrumentet e politikës monetare dhe operacionet që Banka e Shqipërisë realizon nëpërmjet tyre.

 

Sistemi bankar në Shqipëri
		Është një botim tjetër në serinë e broshurave që janë publikuar për qëllime të njohjes së publikut me institucionin e bankës, mënyrën e funksionimit të saj, përparësitë e të punuarit me to dhe sigurinë që ato ofrojnë. Broshura është shkruar në shqip dhe anglisht.

 

Bilanci i Pagesave
		Është një broshurë e shkruar thjesht dhe me një gjuhë të kuptueshme për publikun, që sqaron ç'është bilanci i pagesave, sa familjarë ne të gjithë jemi me të në jetën e përditshme dhe sa të rëndësishme janë statistikat e bilancit të pagesave për ekonominë e një vendi. Është shkruar vetëm në shqip.