DITA E BANKËS SË SHQIPËRISË

Në Fakultetin Ekonomik të Kukësit - 12 shtator 2008

I krijuar në fund të vitit 2007, Fakulteti Ekonomik në Kukës, degë e Universitetit të Tiranës, hapi dyert e tij për të mikpritur specialistë dhe drejtues të bankës qendrore, të cilët organizuan në ambientet e tij "Ditën e Bankës së Shqipërisë". Ky aktivitet, pjesë e programit edukues "Banka Qendrore në jetën e përditshme" dhe i zhvilluar më parë edhe në Tiranë, mbërriti në Kukës për t'i njohur studentët, pedagogët dhe mësuesit e pranishëm me institucionin e bankës qendrore, rolin e tij në ekonomi, objektivin për vendosjen dhe ruajtjen e stabilitetit të çmimeve, si dhe me produktet e shërbimet kryesore të sistemit bankar dhe ecurinë e tij.

I organizuar me ndihmesën e çmuar të rektorit të këtij fakulteti z. Mexhit Hajdari, "Dita e Bankës së Shqipërisë" u përshëndet edhe nga Guvernatori i Bankës së Shqipërisë z. Fullani dhe ai i Bankës Qendrore të Republikës së Kosovës, z. Rexhepi. Gjatë këtij aktiviteti, në hollin e Fakultetit Ekonomik të Kukësit u ekspozuan të gjitha botimet e Bankës së Shqipërisë dhe specialistë të Bankës u vunë në dispozicion të të pranishmëve për prezantime dhe diskutime mbi bankingun qendror dhe atë tregtar, objektivat, funksionet dhe shërbimet e tyre. Nga pyetësorët e shpërndarë, rezultoi se auditori i pranishëm e vlerësoi si shumë të dobishme dhe interesante iniciativën e Bankës së Shqipërisë në fushën e edukimit të publikut.

 

* * *

 

Në Universitetin Europian të Tiranës - 4 shkurt 2008

Në 4 shkurt, ishte Universiteti Europian i Tiranës, ai i cili ftoi një aktivitet të tillë në ambientet e tij.

Guvernatori i Bankës së Shqipërisë, z. Ardian Fullani, hapi këtë aktivitet, duke mbajtur një leksion me temë "Banka e Shqipërisë - hap pas hapi drejt konvergjencës", në sallën kryesore të këtij Universiteti. Të pranishëm në këtë leksion ishin rreth 200 studentë e pedagogë të tij si edhe mjaft drejtues e specialistë të Bankës së Shqipërisë. Me përfundimin e leksionit të Guvernatorit, aktiviteti u spostua në hollin e Universitetit, ku me rastin e “Ditës së Bankës” ishin ekspozuar të gjitha botimet e Bankës së Shqipërisë dhe specialistë të bankës qendrore zhvilluan biseda me studentët, mbi tema rreth bankës qendrore dhe funksionit të saj, rolit që ajo luan në ekonominë dhe mirëqenien e një vendi; zhvillimeve të sotme në bankingun modern dhe produkteve më të fundit që ky ofron; financave personale.