Ligj nr.9662, datë 18.12.2006 "Për bankat në Republikën e Shqipërisë"

 

Ligji synon modernizimin e legjislacionit bankar në Shqipëri me qëllim harmonizmin e tij më të drejtën komunitare. Ai merr në konsideratë detyrimet e Shqipërisë që rrjedhin nga Marrëveshja e Stabilizim Asociimit në fushën e shërbimeve financiare, në përgjithësi dhe atyre bankare, në veçanti, të cilat kanë të bëjnë me lirinë e themelimit ofrimit të shërbimeve bankare dhe financiare. Ligji është harmonizuar gjithashtu edhe me direktivat kodifikuese të Bashkimit Evropian në fushën e të drejtës bankare, si dhe me Parimet Thelbësore të Bazelit. Projektligji i ka kushtuar vëmendje të veçantë vendosjes së kritereve dhe kushteve të qarta dhe specifike për licensimin e bankave dhe degëve të bankave të huaja. Ai është harmonizuar edhe me legjislacionin shqiptar në fuqi i cili parashikon licensimin dhe mbikëqyrjen e aktiviteteve financiare nga autoritete të tjera rregullatore, siç është edhe Autoriteti i Mbikëqyrjes Financiare, apo Agjencia e Sigurimit të Depozitave. Një nga risitë kryesore të ligjit është rregullimi i mbikëqyrjes së konsoliduar të grupeve bankare dhe financiare. Për shkak të rëndësisë së këtyre konglomeratëve financiarë, ligji, në rregullimin që parashikon, është mbështetur në praktikën më të mirë të vendeve fqinje dhe atë të Bashkimit Evropian. Për rritjen e transparencës së veprimtarisë së Bankës së Shqipërisë, ligji parashikon edhe procedura të qarta të ankimit administrativ ndaj masave administrative që Banka e Shqipërisë merr kundrejt subjekteve që rregullohen nëpërmjet tij. Përcaktimi i këtyre procedurave të qarta ofron garanci për moscënimin arbitrar të të drejtave të subjekteve që preken nga çdo akt administrativ i Bankës së Shqipërisë me karakter parandalues, mbikëqyrës ose ndëshkues, në përputhje me parimet mbi kontrollin e brendshëm dhe atë gjyqësor të akteve administrative të përcaktuar në Kodin e Procedurave Administrative dhe në Kodin e Procedurës Civile. Shpallur me dekretin nr. 5178, datë 12.1.2007 të Presidentit të Republikës së Shqipërisë.

Publikimi i plotë (338.74 KB)