Botimet e Bankës së Shqipërisë

Në përmbushje të objektivave të saj, Banka e Shqipërisë ka përgjegjësinë të informojë publikun shqiptar rreth politikës së saj monetare në veçanti dhe gjendjes ekonomike në vend, në përgjithësi. Në këtë kuadër, dhe gjithashtu për të pasuruar njohuritë e publikut e për t'i shpjeguar atij rolin dhe funksionet e saj, botimet e Bankës së Shqipërisë janë të disponueshme për këdo që është i interesuar.

 

Publikime formale

Raporti Vjetor

Raporti Vjetor i Bankës së Shqipërisë përmban një analizë të gjendjes ekonomiko-financiare të vendit, veprimtarinë e Bankës së Shqipërisë gjatë një viti dhe pasqyrat e llogaritë financiare, të shoqëruara nga opinioni i kontrollorëve, lidhur me gjendjen financiare të Bankës së Shqipërisë. Ai gjithashtu, bën një përshkrim të zhvillimeve në ekonominë botërore dhe impaktin e saj mbi ekonominë vendase; të zhvillimeve në tregjet monetare, mbikëqyrjen bankare si dhe të veprimtarive të tjera të Bankës së Shqipërisë. 

Raportet e Politikës Monetare

Vendimmarrja politike e Bankës së Shqipërisë është një e drejtë eksluzive e Këshillit Mbikëqyrës së saj. Ky proces vendimmarrjeje bazohet në analizat dhe në parashikimet që çdo muaj të vitit janë pjesë e njërit prej raporteve të mëposhtme të politikës monetare:

 

Raporti Tremujor i Politikës Monetare i cili përshkruan zhvillimet monetare për tremujorin e parë dhe për nëntëmujorin. Një vend të rëndësishëm përbën qëndrimi që duhet mbajtur në të ardhmen.

Raporti Gjashtëmujor i Politikës Monetare. Ky raport analizon dhe vlerëson zhvillimet ekonomike e financiare të ekonomisë shqiptare gjatë gjashtë muajve të parë ose të fundit të një viti të caktuar. Në varësi të këtyre zhvillimeve, të ndikimit të tyre në inflacionin e periudhës së shqyrtuar dhe të pritjeve për të ardhmen jepet dhe qëndrimi i politikës monetare të Bankës së Shqipërisë.

Dokumenti i Politikës Monetare. Është një përmbledhje e thjeshtuar e politikës monetare, që Banka e Shqipërisë do të ndjekë gjatë një viti.

Raporti Statistikor

Raporti Statistikor është botim i përmuajshëm që përgatitet nga Departamenti i Statistikës dhe përmban të dhëna për sektorin real, sektorin financiar, sektorin fiskal dhe sektorin e jashtëm.

 

Buletini Zyrtar 

Buletini Zyrtar është botim që përgatitet jo më pak se një herë në muaj dhe përmban të gjitha vendimet e Këshillit Mbikëqyrës të Bankës së Shqipërisë, me përjashtim të atyre që kanë karakter sekret ose konfidencial, rregullore, deklarata, opinione, rekomandime si dhe çdo akt tjetër me karakter të përgjithshëm, që gjykohen të përshtatshme për t'u botuar.

 

Buletini Ekonomik  

Buletini Ekonomik përmbledh analiza, vlerësime që kanë të bëjnë me politikën monetare të Bankës së Shqipërisë si dhe informacione të ndryshme mbi sistemin bankar. Ky publikim ka një frekuencë tremujore dhe përmban: deklaratat zyrtare të Bankës së Shqipërisë, të cilat përpilohen në zbatim të kërkesave të ligjit në fuqi "Për Bankën e Shqipërisë" si deklarata për politikën monetare, opinioni i pavarur mbi gjendjen e ekonomisë shqiptare, deklarata të bilancit të pagesave; prezencën e administratorëve të Bankës së Shqipërisë në publik; artikuj të ndryshëm që trajtojnë çështje ekonomike, financiare e juridike; rezultate të vrojtimeve statistikore të kryera nga Banka e Shqipërisë; të dhëna statistikore mbi sistemin bankar; situatën monetare dhe ekonominë reale; listën e bankave të nivelit të dytë që kanë marrë licencë për të operuar në Republikën e Shqipërisë, adresat dhe kontaktet e tyre, listën e zyrave të këmbimit valutor që kanë marrë licencë nga Banka e Shqipërisë dhe adresat e tyre; strukturën organizative dhe drejtuesit e Bankës së Shqipërisë (anëtarët e Këshillit Mbikëqyrës dhe drejtorët e departamenteve).

 

Raporti i Stabilitetit Financiar

Është një dokument i përvitshëm që analizon zhvillimet me rëndësi të sistemit financiar gjatë një viti kalendarik dhe evidenton faktorët që përfaqësojnë rrezik sistemik. Aibën identifikimin dhe vlerësimin e rreziqeve me të cilat ndeshet sistemi financiar dhe infrastruktura e tij, për t'i dhënë autoriteteve publike mundësinë që të identifikojnë masat përkatëse për korrigjimet e nevojshme. Për hartimin e raportit, shfrytëzohen të dhëna që disponohen në Bankën e Shqipërisë, si dhe shkëmbehet informacion me autoritete të tjera që mbikëqyrin veprimtarinë e tregut financiar. RSF u publikua për herë të parë në 2008 dhe botohet në gjuhët shqipe dhe angleze.

Raporti Vjetor i Mbikëqyrjes

Raporti Vjetor i Mbikëqyrjes përgatitet nga Departamenti i Mbikëqyrjes dhe përmban: një analizë vjetore të veprimtarisë së sistemit bankar dhe të mbikëqyrjes së Bankës së Shqipërisë; një kuadër të plotë të ndryshimeve rregullatore mbikëqyrëse në përshtatje me standardet dhe praktikat më të mira ndërkombëtare; statistika dhe informacione mbi subjektet e licencuara nga Banka e Shqipërisë si dhe çështje të ecurisë së sistemit bankar.

Buletini Vjetor i Bilancit të Pagesave

Buletini Vjetor i Bilancit të Pagesave analizon hollësisht zhvillimet e sektorit të jashtëm të ekonomisë shqiptare, për vitin përkatës. Në këtë botim, bëhet një analizë e bilancit të pagesave sipas zërave të veçantë të llogarisë korente dhe llogarisë kapitale dhe financiare. Ai përmban analiza të detajuara të zhvillimeve në tregtinë e jashtme sipas grupmallrave dhe shteteve, analiza të ecurisë së shërbimeve, të të ardhurave, të transfertave korente dhe transaksioneve në llogarinë kapitale dhe financiare. Nëpërmjet një përshkrimi sintetik, ofron për përdoruesit e pasqyrës së bilancit të pagesave njohje me konceptin "bilanc pagesash", duke prezantuar njëkohësisht burimet dhe metodologjinë e përdorur në hartimin e Bilancit Shqiptar të Pagesave. Buletini përmban, gjithashtu, një aneks statistikor ku do të gjeni seri kohore të dhënash për zërat kryesorë të bilancit të pagesave.

 

Publikime njohëse dhe informative 

Katalogu i Publikimeve

Katalogu i publikimeve të Bankës së Shqipërisë është një botim me frekuencë të rregullt vjetore, i cili përmban një përmbledhje të kolanave periodike, raporteve periodike ose jo; dhe të tjera botimeve që Banka e Shqipërisë ka përgatitur gjatë një viti kalendarik për bankat tregtare, për institucione të ndryshme e individë, për publikun e gjerë në përgjithësi, brenda e jashtë vendit. Krahas tyre, katalogu ka edhe një përmbledhje të artikujve të punonjësve së Bankës së Shqipërisë, të cilat publikohen në botime jashtë bankës.

Analiza vrojtimi

Janë publikime të departamenteve të ndryshme të Bankës së Shqipërisë, të cilat pasqyrojnë rezultatet dhe komentet e vrojtimeve që kryhen sistematikisht ose jo, mbi veprimtarinë kredituese e depozituese të institucioneve financiare, ecurinë e marrëdhënieve të tyre me klientelën (biznese dhe individë), mbi ecurinë e investimeve të huaja direkte, reagimin e tregjeve ndaj vendimeve të politikës monetare, turizmin etj...

Materiale Diskutimi

Këto janë studime, analiza kërkimore mbi çështje të ndryshme. Ato prekin aspekte teorike dhe praktike me rëndësi për zhvillimet ekonomike, për jetën aktuale financiare të vendit dhe pritjeve për zhvillim. Në këto materiale gjenden analiza krahasuese, konstatime, propozime dhe ide të reja. Ato përgatiten nga punonjësit e Bankës së Shqipërisë. Pikëpamjet e shprehura në këto materiale janë të autorëve dhe jo domosdoshmërisht ato të Bankës së Shqipërisë.

 

Të tjera

Në këtë grup përfshihen përgjithësisht publikime që i shërbejnë njohjes dhe kuptimit më të thellë nga ana e publikut të funksionimit të sistemit financiar në përgjithësi dhe të atij bankar në veçanti. Në këtë kategori renditen publikime të fushës juridike (botime të ligjeve që rregullojnë sistemin bankar shqiptar e komentarë të tyre), publikime edukative informative: broshura, fletëpalosje, fletëvolante, njohëse me karakter masiv mbi funksionimin e bankingut qendror, të sistemit bankar e parasë.

Një vend të veçantë në këtë kategori zënë edhe seria e librave të Konferencës së Bankës së Shqipërisë, ku publikohen punimet e studimet e paraqitura në konferencat shkencore vjetore të organizuara nga Banka e Shqipërisë, si dhe punimet e monografitë mbi Bankën e Shqipërisë e historinë e saj.