BANKA E SHQIPËRISË

DEPARTAMENTI I MARRËDHËNIEVE ME JASHTË, INTEGRIMIT EVROPIAN DHE KOMUNIKIMIT

NJOFTIM PËR SHTYP
Takimi "Sistemi bankar në 2007: Guvernatori komunikon me tregun", Hotel "Tirana International", 26 mars 2007

Në datën 26 mars 2007, Banka e Shqipërisë zhvilloi takimin "Sistemi bankar në 2007: Guvernatori komunikon me tregun". Ky takim u organizua në vazhdën e traditës institucionale të Bankës së Shqipërisë të komunikimit me aktorët e tregut dhe me publikun, në përgjithësi. Në këtë takim ishin të pranishëm përfaqësues të bankave të nivelit të dytë, të shoqërive të kursim-kreditit, të shoqatave të biznesit, opinionistë, gazetarë si dhe përfaqësues të institucioneve të tjera financiare të vendit.

Qëllimi i këtij takimi ishte thellimi i dialogut institucional të Bankës së Shqipërisë me grupet e interesit, në funksion të rritjes së efikasitetit të vendimeve të politikës monetare dhe forcimit të mëtejshëm të mbikëqyrjes të sistemit bankar. Pjesëmarrësit diskutuan gjerësisht lidhur me administrimin e likuiditetit, pritshmëritë e tregut si dhe stabilitetin financiar dhe konsolidimin e sistemit bankar.

Në hapje të fjalës së tij, Guvernatori i Bankës së Shqipërisë, z. Ardian Fullani bëri një ekspoze të zhvillimeve kryesore të ekonomisë shqiptare për vitin 2006. Ndërmjet të tjerash ai theksoi se: "ekonomia shqiptare ka vazhduar rrugën e saj të konsolidimit makroekonomik. Kjo rritje është shoqëruar me stabilitet çmimesh, të shprehur në një inflacion mesatar vjetor prej 2.4 për qind. Kushtet monetare, të karakterizuara nga norma historikisht të ulëta interesi dhe qëndrueshmëri e kursit të këmbimit, kanë favorizuar rritjen e investimeve dhe të konsumit në ekonomi. Në mënyrë të veçantë, ato janë reflektuar edhe në rritjen e shpejtë të kredisë, duke mbështetur më tej rritjen e ekonomisë". Gjatë vitit 2006, Banka e Shqipërisë ka ndryshuar drejtimin e politikës së saj monetare, ku si pasojë e një sërë faktorësh rreziku ajo ka rritur dy herë normën bazë të interesit në nivelin 5.5 për qind, në funksion të objektivit të saj kryesor, ruajtjes së stabilitetit të çmimeve. Banka e Shqipërisë është e bindur se vendimet e marra prej saj ishin të përshtatshme dhe ato kanë shërbyer për të orientuar pritjet inflacioniste, brenda intervalit të vendosur si objektiv.

Një çështje me rëndësi të veçantë për zbatimin e vendimmarrjes së politikës monetare, mbetet administrimi i likuiditetit të sistemit bankar. Në fjalën e tij zoti Fullani theksoi se: "administrimi i likuiditetit synon kontrollin e normave afatshkurtra të likuiditetit, për t'i mbajtur ato në të njëjtën linjë me vendimet e politikës monetare". Banka e Shqipërisë po punon për përmirësimin e mëtejshëm të kuadrit rregullativ, i cili do të ndihmojë në zhvillimin e mëtejshëm të tregut të parasë, duke synuar në veçanti një treg ndërbankar më likuid dhe më aktiv në administrimin e tepricave të likuiditetit nga ana e bankave të nivelit të dytë.

Në këtë takim, është prezantuar edhe një projekt i ri i Bankës së Shqipërisë lidhur me pritshmëritë e tregut financiar, në raport me zhvillimet e ardhsme në inflacion, në kursin e këmbimit dhe përqindjen bazë të interesit. Në fjalën e tij, zoti Fullani insistoi se kjo është "një sfidë e re për sistemin bankar, prandaj i gjithë sistemi të ndalet seriozisht në këtë problem dhe shumë shpejt, të inkorporojë në strukturat organizative të tij, qendrat e analizës dhe të kërkimit shkencor".

Ai gjithashtu, i ka vënë një theks të veçantë stabilitetit financiar të vendit kur duke shprehur se: "stabiliteti makroekonomik është i një rëndësie parësore por pa dyshim, që i një rëndësie po kaq jetike është dhe stabiliteti financiar". Pavarësisht faktit se sistemi bankar në Shqipëri është shndërruar në promotor të mbështetjes ekonomike të vendit, kjo nuk do të thotë që automatikisht jemi të imunizuar ndaj rreziqeve të ndryshme. Në këtë kuadër, Banka e Shqipërisë jo vetëm që ka rritur masat mbikëqyrëse dhe vigjilencën e saj, por gjithashtu ka vendosur të krijojë edhe një njësi të specializuar, Departamentin e Stabilitetit Financiar.

Banka e Shqipërisë, duke qenë plotësisht e përgjegjshme për rolin e saj themelor në drejtim të stabilitetit financiar, në praktikat e saj të licencimit do të synojë: "praninë në sistemin bankar të institucioneve të shëndosha, që mbështeten nga aksionerë të fuqishëm dhe me përvojë në industrinë bankare; që zbatojnë standardet më të mira të përgjegjshmërisë në drejtim; që realizojnë një veprimtari të ekuilibruar me rreziqe të mirëadministruara; që janë në gjendje të përballojnë dhe të zhvillohen në kushtet e konkurrencës që ofron një treg i hapur dhe i integruar në tregun financiar ndërkombëtar; që mbështesin zhvillimin e ekonomisë së vendit dhe që, në mënyrë transparente, i ofrojnë publikut shërbime dhe produkte bankare cilësore dhe eficiente."

Për këtë qëllim, nga ana e Guvernatorit të Bankës së Shqipërisë, zotit Fullani u kërkua që: "bankat të ngrenë dhe të forcojnë strukturat e tyre të administrimit të rreziqeve, kryesisht në drejtim të rreziqeve të tregut, të rrezikut të kreditit dhe të rrezikut operacional, që nënkupton jo vetëm sigurimin e kapaciteteve njerëzore, por edhe vendosjen në funksionim të sistemeve të nevojshme të teknologjisë së informacionit. Sidomos, rëndësi të veçantë ka monitorimi i vazhdueshëm dhe zhvillimi i kontrolluar i veprimtarisë së kreditimit, si dhe forcimi i sistemeve të brendshme të kontrollit të veprimtarisë dhe të pasqyrimit të saj nga ana e bankave".

Sistemi bankar dhe grupet e tjera të përfaqësuara në këtë takim vlerësuan me optimizëm, praktikën e re të komunikimit të drejtpërdrejtë të Bankës së Shqipërisë me tregun, duke e cilësuar atë si shprehje maturimi dhe përgjegjshmërie institucionale të bankës qendrore të vendit. Në komentet që bënë përfaqësues të sistemit bankar, shoqatave të biznesit, të institucioneve të tjera financiare prezantuan edhe disa nga shqetësimet e tyre, të cilat më së shumti konvergonin në domosdoshmërinë për modifikime të mëtejshme ligjore, në pjesën që lidhet me regjistrimin dhe veçanërisht, pjesën që lidhet me ekzekutimin e kolateraleve.

Në përfundim, u theksua se ky takim do t'i paraprijë një tradite të re, asaj të instalimit të një dialogu konstant midis Bankës së Shqipërisë dhe grupeve të interesit.