Godina e Bankës së Shqipërisë ka përfunduar së ndërtuari në vitin 1936. Stili i saj arkitektonik i përket rrymës së "Racionalizmit", rrymë e cila lulëzoi në gjysmën e parë të shekullit XX në Evropë. Projekti i godinës është realizuar nga arkitekti i njohur italian i asaj periudhe Vitorio Marpurgo.

Ky stil shquhet për volumet e mëdha dhe linjat e forta në fasada. Kryesisht ai është aplikuar në ndërtimet shtetërore me karakter zyrtar, me qëllim që të shprehte forcën e qeverive të asaj kohe dhe është përdorur në shumë vende të Evropës Perendimore. Në këtë këndvështrim edhe godina e Bankës së Shqipërisë bën pjesë në ndërtimet më të spikatura të asaj kohe ne llojin e vet, rrymës Racionaliste.

Prania e kësaj ndërtese në sheshin qendror të Tiranës që mban emrin e luftëtarit të famshëm të mesjetës "Skënderbej" e ka justifikuar plotësisht respektin e qytetareve të Tiranës dhe gjithë shqiptareve.
Në projekt-idenë e saj, godina është konceptuar me planimetri shumëkëndëshe dhe ndarë nga ana funksionale në dy pjesë, në korpusin kryesor që do të kryente funksionin përfaqësues të bankës dhe në pjesën operative të saj. Kjo e fundit do të ndërtohej në të dy krahët anësore të prapme të korpusit kryesor. Kjo pjesë do të ndërtohej në vitet 40-të por, për arsye të luftës së Dytë Botërore nuk u realizua ndërtimi i saj.

Korpusi kryesor i saj është i ndërtuar në formën e një harku, i detyruar nga pozicioni i saj në sheshin kryesor të qytetit. Hyrja e saj kryesore është realizuar nga nje portal madhështor që përfshin të gjithë lartesinë e fasadës dhe i mbështetur në kolona të forta si dhe e zbukuruar me relievë muralë në argjil të pjekur në ngjyrën karakteristike të saj që në kompleks i jep një paraqitje shumë dinjitoze godinës. Krahas godinës së bankës me të dy pjesët e saj kompleksi ishte parashikuar të plotësohej edhe me pallatin e banimit për punonjësit e bankës. Edhe ky objekt ishte ne stil arkitektonik të njëjtë me bankën dhe ishte prashikuar të ndërtohej afër bankes, përbri godinës së Parlamentit Shqiptar të viteve 30-të (sot Teatri i Kukullave).