Politika Monetare, InstrumentEt, Strategjia e
Zhvillimit të saj

Banka e Shqipërisë është institucioni i vetëm në Republikën e Shqipërisë përgjegjës për konceptimin, hartimin, miratimin dhe zbatimin e politikës monetare. Politika monetare hartohet në funksion të përmbushjes së objektivit kryesor të Bankës së Shqipërisë: arritjes dhe ruajtjes së stabilitetit të çmimeve. Ajo përfshin ndërhyrjen dhe/ose qëndrimin e Bankës së Shqipërisë ndaj tregjeve financiare për të arritur objektivin e saj kryesor. Në tërësinë e saj, politika monetare përmbledh bazën ligjore në të cilën mbështetet, kuadrin teorik që përdoret për modelimin e saj, objektivat e ndërmjetëm dhe operacionalë të politikës monetare dhe kuadrin e instrumenteve, të cilat përdoren për përmbushjen e tyre.

Komunikimi i vendimeve të politikës monetare

Politika monetare dhe vendimet e marra në zbatim të saj i komunikohen publikut nëpërmjet këtyre dokumenteve:

• Dokumenti i politikës monetare, që përshkruan parimet kryesore të kësaj politike të miratuar.
• Raporti i Politikës Monetare , që  është instrumenti kryesor i komunikimit të politikës monetare me publikun, i cili paraqet një tablo gjithëpërfshirëse të zhvillimeve më të fundit makroekonomike dhe faktorëve që kanë ndikuar dhe priten të ndikojnë në ecurinë e çmimeve të konsumit në vend.
• Publikimi i vendimeve të Këshillit Mbikëqyrës të Bankës së Shqipërisë në lidhje me normat e interesit brenda 48 orëve nga marrja e vendimit.
• Konferencat e shtypit të Guvernatorit të Bankës së Shqipërisë për të komunikuar dhe për të shpjeguar vendimet e politikës monetare.
• Publikimi i të gjitha rregulloreve dhe të akteve të tjera, që kanë të bëjnë me instrumentet e përdorura për zbatimin e politikës monetare.