Raporti Vjetor 2003 - Kapitulli III. Zhvillimet Monetare dhe Tregjet

Data e prodhimit: 13.04.2004

Data e shtypjes: 23.08.2004

Autori: Banka e Shqipërisë

 

 

Politika monetare e Bankës së Shqipërisë është orientuar drejt realizimit të objektivit të inflacionit. Në përputhje me këtë politikë, Banka e Shqipërisë synon administrimin e kushteve monetare në ekonomi në funksion të përmbushjes së objektivit të inflacionit në një horizont afatmesëm. Parashikimet e zhvillimeve monetare përmblidhen në kornizën e programit monetar për një afat kohor prej një viti. Në këtë këndvështrim, programi monetar përcakton drejtimin në të cilin duhet të lëvizin treguesit monetarë për të përmbushur objektivin kryesor të Bankës së Shqipërisë. Gjithashtu, ai është edhe një instrument kontrolli për të vlerësuar ecurinë aktuale të treguesve monetarë dhe për të programuar ndërhyrjet e nevojshme.