Raporti Vjetor 2008 - Kapitulli 3. Zhvillimet monetare dhe tregjet financiare

Data e prodhimit: 21.05.2009

Data e shtypjes: 21.05.2009

Autori: Banka e Shqipërisë

 

 

Ecuria e treguesve monetarë gjatë vitit 2008 ka evidentuar stabilizimin e ritmeve të zgjerimit të ofertës së parasë në përputhje me ecurinë e mjeteve të brendshme neto, të cilat kanë reflektuar kërkesën për para të agjentëve ekonomikë. Ritmet e rritjes së M3 real kanë ardhur në rënie gjatë dy viteve të fundit, duke sugjeruar për kontrollin më të mirë të presioneve inflacioniste. Ky ngadalësim është kushtëzuar edhe nga shtrëngimi gradual i politikës monetare gjatë kësaj periudhe, nëpërmjet rritjes së normës bazë të interesit. Gjatë vitit 2008, politika monetare e Bankës së Shqipërisë ka qenë neutrale, duke ndihmuar në konsolidimin e mëtejshëm të ngadalësimit të ritmit të ekspansionit monetar. Në aspektin sektorial, zhvillimet monetare gjatë vitit 2008 kanë reflektuar nevojat më të larta për financim të sektorit privat, kërkesën më të ulët të sektorit fiskal dhe kontributin negativ të komponentit valutor. Kreditimi i sektorit privat ka vazhduar të gjenerojë flukse të larta monetare, duke dominuar shtesën e stokut të parasë edhe gjatë vitit 2008. Ndërkohë, zgjerimi i kredisë në valutë me ritme më të larta se depozitat, ka çuar në uljen e pretendimeve valutore të bankave ndaj jorezidentëve dhe për pasojë, në kontributin negativ të komponentit valutor në zgjerimin e parasë.