Rreth inflacionit

Në bazë të ligjit të Bankës së Shqipërisë, objektivi kryesor i Bankës së Shqipërisë është arritja dhe ruajtja e stabilitetit të çmimeve. Nëpërmjet garantimit të stabilitetit të çmimeve, Banka e Shqipërisë jep një kontribut direkt në ekuilibrat makroekonomikë të vendit, në rritjen ekonomike dhe në rritjen e mirëqenies, si dhe në garantimin e stabilitetit të sistemit financiar.

Arritja dhe ruajtja e stabilitetit të çmimeve nënkupton arritjen e normave të ulëta por pozitive të inflacionit, dhe mbajtjen e tyre për periudha relativisht të gjata kohe. Në terma sasiorë, Banka e Shqipërisë do të kuptojë me stabilitet çmimesh mbajtjen e inflacionit në nivelin 3.0 për qind, me një mundësi luhatjeje prej ± 1 pikë përqindjeje rreth kësaj vlere qendrore. Si objektiv i inflacionit do të vazhdojë të jetë ndryshimi vjetor i Indeksit të Çmimeve të Konsumit, matur dhe publikuar nga INSTAT. Ky objektiv është i shtrirë për gjithë periudhën 2009-2011.

Përcaktimi i mësipërm sasior i stabilitetit të çmimeve reflekton realitetin e ekonomisë shqiptare, si një ekonomi në zhvillim e cila synon të integrohet me ekonomitë e Bashkimit Evropian. Këto ekonomi karakterizohen nga luhatje më të mëdha të çmimeve relative drejt gjetjes së ekuilibrave të duhur të ekonomisë së tregut dhe arritjes së konvergjencës strukturore. Në të njëjtën kohë, ruajtja e objektivit të inflacionit në të njëjtin nivel me vitet paraardhëse dhe zgjatja kohore e objektivit të shpallur të inflacionit, do të kontribuojë pozitivisht në ankorimin më të mirë të pritjeve të publikut rreth objektivit të shpallur të Bankës së Shqipërisë.

Banka e Shqipërisë gjykon se, nëpërmjet ruajtjes së inflacionit rreth nivelit 3.0 për qind, politika monetare do të vazhdojë të japë një kontribut pozitiv në zhvillimin e ekonomisë shqiptare. Një nivel i tillë inflacioni dhe politika monetare e zbatuar për përmbushjen e tij ndikojnë pozitivisht në ritmet e rritjes ekonomike, ashtu siç është provuar gjatë viteve të fundit.