Strukturat vlerësuese në Bankën e Shqipërisë 

Strukturat që vlerësojnë stabilitetin e sistemit financiar në Bankën e Shqipërisë janë:

 

Departamenti i Stabilitetit Financiar

Në mënyrë që të realizojë rolin e Bankës së Shqipërisë në drejtim të ruajtjes së stabilitetit të sistemit financiar, me vendimin nr.52, datë 26.09.2007, Këshilli Mbikëqyrës ka miratuar krijimin e Departamentit të Stabilitetit Financiar (DSF). Ky departament ka për qëllim vlerësimin e qëndrueshmërisë së sistemit financiar, nëpërmjet zbatimit të metodave të ndryshme dhe realizimit të analizave, në të cilat përcaktohet lloji dhe madhësia e rreziqeve sistemike që i kanosen sistemit financiar dhe infrastrukturës së tij, si rezultat i zhvillimeve që ndodhin në tregjet financiare dhe në pjesëmarrësit e tyre.

Për realizimin e qëllimit te tij, Departamenti i Stabilitetit Financiar mbledh dhe analizon të dhëna, si dhe përgatit informacione në lidhje me vlerësimin e rreziqeve kryesore të sistemit financiar, propozon pranë Administratorëve të Bankës së Shqipërisë, Komitetit Këshillimor të Stabilitetit Financiar dhe Këshillit Mbikëqyrës veprimet e nevojshme, si edhe përgatit për publikim dokumente të cilat shprehin qëndrimin e Bankës së Shqipërisë ndaj çështjeve të stabilitetit të sistemit financiar.

Produktet kryesore periodike të publikuara nga Departamenti i Stabilitetit Financiar janë:

• Raporti i Stabilitetit Financiar (frekuencë gjashtëmujore).
• Deklarata e Stabilitetit Financiar (pjesë përbërëse e RSF).

Më shumë për DSF

 

 

Komiteti Këshillimor i Stabilitetit Financiar

Me vendimin nr.79, datë 12.12.2007, Këshilli Mbikëqyrës ka miratuar krijimin e Komitetit Këshillimor të Stabilitetit Financiar. Komiteti, nëpërmjet veprimtarisë së tij, ka si qëllim të përmirësojë në vazhdimësi cilësinë e analizës dhe të vendimmarrjes së Bankës nëpërmjet këshillimit të organeve drejtuese të saj, për çështje që lidhen me stabilitetin financiar.

Komiteti, në funksion të qëllimit të tij, ushtron funksionet e mëposhtme:

• shqyrton dhe vlerëson në mënyrë të vazhdueshme politikat e Bankës në lidhje me stabilitetin financiar dhe mbikëqyrjen e sistemit bankar, gjendjen e stabilitetit të sistemit financiar dhe veprimet e Bankës e të autoriteteve të tjera për ruajtjen e tij, nivelet e rrezikut në sistemin financiar dhe masat për administrimin e tij;
• formulon rekomandime për Këshillin Mbikëqyres dhe per administratorët e Bankës, për çështje të stabilitetit financiar dhe veprime të caktuara në këtë drejtim, nëpërmjet paraqitjes së konkluzioneve të mbledhjeve të tij; si edhe,
• shërben si një instrument për të harmonizuar rolin dhe veprimet e Bankës në këtë kuadër, me institucione të tjera. 

 

Më shumë për KKSF