Konkursi i Bankës së Shqipërisë për shkollat e mesme

"Vlera e Vërtetë e Parasë!"

Konkursi “Vlera e Vërtetë e Parasë” është një sfidë midis ekipeve të shkollave të mesme të një rrethi, mbi njohuritë e tyre për Bankën e Shqipërisë, politikën e saj monetare, instrumentet që ajo përdor si dhe ndikimin e vendimeve të bankës qendrore në ekonominë e vendit. Të përfaqësuara nga skuadra prej tre nxënësish të vitit të tretë, shkollat e mesme vihen përballë një serie pyetjesh të drejtuara nga Juria e përbërë nga drejtues të Bankës së Shqipërisë dhe vlerësohen jo vetëm mbi njohuritë e tyre, por edhe mbi aftësitë analitike të argumentimit të përgjigjeve dhe punës në grup.

Me organizimin e një konkursi të tillë, Banka e Shqipërisë synon të ngacmojë me një mënyrë sfiduese, kuriozitetin e gjimnazistëve për një argument jo aq “argëtues”, siç mund të jetë bankingu qendror. Duke i vënë në pozitat e Këshillit Mbikëqyrës të Bankës Qendrore, konkursi fton nxënësit të njohin nga afër punën e tij për arritjen dhe ruajtjen e stabilitetit të çmimeve në vend, si dhe synon të nxisë interesin e brezit të ri për studime universitare dhe pasuniversitare në lëndët e ekonomisë, biznesit dhe financës.

Fillimisht, ky konkurs u zhvillua për shkollat e mesme të kryeqytetit gjatë datave 2, 4 dhe 25 prill 2008, ku morën pjesë njëzet shkolla, publike dhe jopublike. Ndërkohë, për vitin shkollor 2008-2009 “Vlera e Vërtetë e Parasë” është organizuar në Vlorë, Shkodër, Korçë, Gjirokastër dhe Tiranë.

 

Rregullat e zhvillimit të konkursit (Albanian only)

Material përgatitor për konkursin (Albanian only)