Prof.Dr. Halit Xhafa është diplomuar për Financë-Kontabilitet në Fakultetin e Ekonomisë të Universitetit të Tiranës në vitin 1973. Ka fituar gradën «Doktor» në 1986 si dhe titullin «Profesor» në vitin 1994.

Karriera profesionale e tij fillimisht lidhet me sistemin bankar duke punuar 8 vjet, përkatësisht në Drejtorinë e Përgjithshme të Bankës së Shtetit e më pas në Bankën Bujqësore Durrës. Pas kësaj ajo lidhet ngushtë me veprimtarinë akademike në Fakultetin e Ekonomisë të Universitetit të Tiranës, e cila nis në 1980 si pedagog, për të vazhduar më pas në 1992, si Përgjegjës i Katedrës së Financës, e më vonë si Zëvendësdekan i Fakultetit të Ekonomisë e Shef i Departamentit të Financë-Kontabilitetit, detyrë kjo e fundit në të cilën ka qëndruar deri në vitin 2003. Prof. Xhafa është titullari i lëndëve të Drejtimit Financiar dhe Drejtimit Financiar Ndërkombëtar në Fakultetin e Ekonomisë (sistemi universitar), si dhe lektor në lëndët e Drejtimit Financiar të Avancuar në sistemin MBA e MMK, në Drejtimin Financiar të Institucioneve Publike në sistemin e MPA dhe në Drejtimin Financiar Ndërkombëtar në sistemet MSEE dhe MF.

Përveç veprimtarisë akademike, Prof. Xhafa ka patur në vite edhe një sërë angazhimesh të tjera profesionale në borde e këshilla; ai ka qenë Drejtor në Drejtorinë e Mbikëqyrjes Bankare në Ministrinë e Financave (1997), anëtar i Bordit të Privatizimit të Shqipërisë (1993-94), koordinator i Projektit TEMPUS me Universitetet e Siegenit në Gjermani dhe të Portsmuthit në Angli (1993-1995), anëtar i Këshillit Drejtues të Bankës së Kursimeve (1998-2000), Kryetar i Komisionit Shtetëror të Auditit të Brendshëm (2005 e në vazhdim), anëtar i Këshillit Shkencor të Universitetit të Tiranës (1993-1997), i Këshillit Shkencor të Fakultetit të Ekonomisë të këtij Universiteti nga viti 1995 e deri më sot.

Prof. Xhafa dallohet për veprimtaritë dhe kontributin e tij në punën me studentët. Ai ka rekomanduar në mënyrë të vazhdueshme për sistemin bankar, financiar e fusha të biznesit studentë të Fakultetit të Ekonomisë, shumica e të cilëve janë aktualisht lidera të institucionet ku punojnë. Në programin botëror SIFE (studentët në sipërmarrjen e lirë), ekipi studentor i Universitetit të Tiranës, ku ai është në rolin e trainerit, është klasifikuar në 5 ekipet më të mira në Kampionatin Botëror të vitit 2005, Toronto, Kanada dhe kampion i Evropës në vitin 2006, në Paris.

Ai është autor dhe bashkëautor i një sërë librash e tekstesh ekonomike universitare dhe për shkollat e mesme, projektesh, punimesh, artikujsh në revistat shkencore brenda e jashtë vendit, e kumtesash në veprimtari të ndryshme shkencore. Fushat e tij të interesit fokusojnë çështjet lidhur me financat e ndërmarrjeve, të menaxhimit financiar të biznesit, të menaxhimit financiar të institucioneve publike dhe të menaxhimit financiar të kompanive shumëkombëshe.

Njeh mirë gjuhët anglisht dhe rusisht.

Aktualisht, ai është Profesor në Fakultetin Ekonomik të Universitetit të Tiranës

Prof.Dr. Halit Xhafa ka qenë anëtar i Këshillit Mbikëqyrës të Bankës së Shqipërisë në periudhën 1993-96 dhe u rizgjodh përsëri në këtë detyrë, në dhjetor të vitit 2006.

Këshilli Mbikëqyrës:

Anëtarë të tjerë të Këshillit Mbikëqyrës