Ceremonia e çeljes së Javës së Parasë u organizua në ambientet e Muzeut të Bankës së Shqipërisë. Guvernatori i Bankës së Shqipërisë dhe Kryetari i Shoqatës Shqiptare të Bankave në fjalët e tyre të shkurtra përshëndetëse theksuan ndër të tjera misionin e Javës së Parasë, duke promovuar rëndësinë e kulturës financiare për publikun e gjerë dhe në veçanti për brezat e rinj.

Pas fjalëve të rastit, aktiviteti vijoi me shpërndarjen e çmimeve për fituesit e 3 konkurseve të lançuara një muaj më parë nga BSH-ja dhe AAB-ja. Guvernatori Sejko dhe kryetari i AAB-së, Pedrazzi, së bashku me drejtorët e përgjithshëm të bankave tregtare që sponsorizuan çmimet për fituesit e konkurseve, ndanë çmimet dhe bënë foto me nxënësit dhe studentët fitues.

Në konkursin "Paraja: Ç’të mbjellësh, do të korrësh!”, morën pjesë nxënësit e klasave VI të shkollave 9-vjeçare, me projekte kreative, si vizatim, punë dore, të cilat përcollën qartë konceptin e tyre të administrimit të parasë. Në këtë konkurs u paraqitën për konkurrim rreth 70 projekte, të realizuara nga 144 nxënës të 21 shkollave 9-vjeçare.

Konkursi i dytë i organizuar ishte ai i videos më të mirë. Konkursi ftoi nxënësit gjimnazistë të përcillnin me origjinalitet mesazhet e tyre për temën “Paraja: Ç’të mbjellësh, do të korrësh!” përmes një videoje prej jo më të gjatë se 2 min. Videoja mund të ishte produkt i punës individuale ose në grup. Gjithsej në konkurs u paraqitën 24 video, të realizuara nga 40 nxënës të 14 shkollave të mesme të vendit, prej të cilave u shpallën 3 fitues.

Konkursi i tretë i organizuar është ai i esesë më të mirë, me temë “A përbën rrezik përdorimi i euros në transaksionet tregtare në Shqipëri?”. Studentët u ftuan t’i përgjigjeshin pyetjes së shtruar përmes realizimit të një eseje argumentuese, jo më të gjatë se 1500 fjalë, duke përmbushur kriteret e shkrimit akademik.

Muzeun e Bankës së Shqipërisë e vizituan nxënësit e klasës VI të shkollës 9-vjeçare “Jeronim De Rada”, nxënësit e ciklit fillor të shkollës 9-vjeçare “Servete Maçi”, si edhe nxënësit e ciklit 9-vjeçar të kolegjit “Turgut Ozal”. 

ProCredit Bank vuri në dispozicion për nxënësit shkollës së mesme “Besnik Sykja”, degën e saj tek Tirana e Re për të vizituar Zonën 24/7 të bankës. Nxënësit u njohën konkretisht me shërbimet inovative bankare të ofruara 24/7 dhe mësuan avantazhet që sjell për klientët automatizimi i shërbimeve bankare. 

Ndërkohë, Union Bank mirëpriti fëmijët e stafit në moshë shkollore me qëllim edukimin financiar të brezit të ri lidhur me parimet elementare të bankingut dhe kursimit. Gjatë aktivitetit, fëmijët vizituan degën qendrore të bankës, ku u njohën me procedurat bazë, si dhe produktet e shërbimet kryesore të Bankës. 

Në Universitetin Epoka, Tiranë, u zhvillua një leksion i hapur nga zj. Olta Manjani, ekonomiste pranë Departamentit të Politikës Monetare në Bankën e Shqipërisë, me temë “Sistemi monetar dhe roli i Bankës së Shqipërisë në ruajtjen e tij” dhe zj. Suela Totokoci, Drejtore e Departamentit të Thesarit, Banka Intesa Sanpaolo, me temë “Roli i bankave në transmetimin e politikës monetare. Përdorimi i monedhës vendase”.

Më 13 mars 2018, në ambientet e Bankës së Shqipërisë, u zhvillua një leksion i ciklit “Netët e Muzeut”, me temë “Rëndësia e kulturës financiare për sipërmarrësit e rinj dhe për mirëqenien personale”. Leksioni u mbajt nga z. Dritan Mezini, Drejtor i Përgjithshëm i DM-consulting dhe portalit Duapunë.com, i cili iu drejtua një publiku të përbërë kryesisht nga studentë dhe sipërmarrës të rinj, për t’i ndërgjegjësuar mbi rëndësinë e kulturës financiare si pjesë e formimit të përgjithshëm të tyre dhe çelës i suksesit të sipërmarrjes.

Në mjediset e Qendrës Rajonale Rinore të Tiranës, me pjesëmarrjen e nxënësve të shkollave të mesme, u zhvillua një orë e hapur mësimore, nën titullin "Mendoj për nesër". Zj. Najada Xhaxha, Drejtore e Departamentit të Pagesave, pranë Tirana Bank dhe Kryetare e Komitetit për Sistemet e Pagesave në AAB, mbajti një referatë me temë, “Kultura financiare mbi të ardhurat personale“. Ndërsa zj. Gentiana Duka, Drejtore e njësisë për kredinë personale dhe konsumatore, Alpha Bank Albania, mbajti një referatë me temë “Kreditë e buta për studentët".

Me rastin e Javës së Parasë, një nga aktivitetet e organizuara ishte edhe konkursi me projekte për nxënësit e klasave VI, me temë “Paraja: Ç’të mbjellësh do të korrësh”. Me këtë rast, u organizua edhe një ekspozitë e përkohshme me projektet e nxënësve pjesëmarrës në konkurs. Autorët e vegjël së bashku me mësuesit dhe prindërit e tyre u ftuan në një ceremoni, gjatë së cilës u shpërndanë edhe certifikata pjesëmarrjeje.

Në Universitetin “Aleksandër Xhuvani”, Elbasan, u zhvillua një leksion i hapur nga zj. Juna Bozdo, Përgjegjëse e Sektorit të Vlerësimit Sistemik, të Departamentit të Stabilitetit Financiar në Bankën e Shqipërisë, me temë “Stabiliteti financiar, roli i Bankës së Shqipërisë në ruajtjen e tij dhe paketa e deeuroizimit”; zj. Artiola Agalliu, Drejtore e Departamentit të Menaxhimit të Riskut, Union Bank, me temë “Stabiliteti financiar, roli i bankave”; si dhe Marilda Shkurti nga Agjencia e Sigurimit të Depozitave (ASD), me temë “Stabiliteti financiar, roli i skemave të sigurimit të depozitave në ruajtjen e stabilitetit financiar”.

Në Universitetin “Aleksandër Moisiu”, Durrës, u zhvillua një leksion i hapur nga zj. Ela Golemi, anëtare e Këshillit Mbikëqyrës të Bankës së Shqipërisë dhe njëkohësisht Zëvendësdekane në Fakultetin e Kërkimit Shkencor të Biznesit në Universitetin "Aleksandër Moisiu" Durrës, me temë "Rëndësia e përdorimit të monedhës sonë kombëtare në zhvillimin e qëndrueshëm ekonomik të vendit"; si dhe nga zj. Joarda Mema, Përgjegjëse e Sektorit të Zhvillimit të Segmenteve dhe Produkteve në Credins Bank, me temë “Veprimtaria bankare me pakicë (retail): dhënia e kredive dhe depozitave në monedhën vendase”.

Në Universitetin Evropian të Tiranës u zhvillua një leksion i hapur nga zj. Ediola Biçaku, Drejtuese e Departamentit të Auditit të Brendshëm në Intesa Sanpaolo Bank Albania, me temë “Internal Audit in Banking Sector & Future Challenges”.

Në Protik Innovation Center, u zhvillua një leksion i hapur nga zj. Linda Shomo, CE O & themeluese e EasyPay, me temë “Paraja elektronike dhe pagesat në 2020”. Leksioni u drejtohej nxënësve të shkollave të mesme të Tiranës dhe studentëve të universiteteve të ndryshme në vend dhe u pasua nga një quiz i shkurtër që testoi dijet financiare të të rinjve.

Një version i lojës së Tregtisë Ndërkombëtare u organizua nga Junior Achievement, në sallën e konferencave Protik me pjesëmarrjen e 30 nxënësve (17-18 vjeç) nga Tirana. Nxënësit u ndanë në ekipe të përbëra prej pesë personash duke vepruar si një “vend” i veçantë. Vendet, të   klasifikuara sipas nivelit të të ardhurave (të larta, mesatare dhe të ulëta), konkurruan me njëri-tjetrin “për të prodhuar” forma letre (rrethore, trekëndësha, drejtkëndësha, etj.) me qëllim shitjen e tyre tek një tregtar që operon në treg ndërkombëtar, me çmime që variojnë sipas kërkesës dhe ofertës. Ekipi fitues u shpall bazuar në të ardhurat e grumbulluara.