BANKA E SHQIPËRISË
Procedura që ndjekin funksionarët e lartë të Bankës së Shqipërisë për të marrë vendime
Data e publikimit: 23.06.2021
Ligji për Bankën dhe rregullorja e funksionimit të Këshillit Mbikëqyrës përcaktojnë mënyrën e organizimit të mbledhjeve dhe vendimmarrjen e Këshillit.
Mbledhjet e Këshillit zhvillohen sipas kalendarit të miratuar prej tij në fillim të vitit. Ai mblidhet jo më pak se një herë në muaj.
Neni 49 i ligjit për Bankën parashikon se çdo anëtar i Këshillit Mbikëqyrës ka të drejtën e një vote. Mbledhja zhvillohet me praninë e më shumë se gjysmës së anëtarëve, duke përfshirë Kryetarin (Guvernatori) ose Zëvendëskryetarin (Zëvendësguvernatorin e Parë) të tij.
Përveç rasteve kur është parashikuar ndryshe në ligj, vendimet e Këshillit Mbikëqyrës miratohen me shumicën e thjeshtë të votave të anëtarëve të pranishëm në mbledhje.
Neni 50 përcakton se procedurat dhe rezultatet e mbledhjeve janë konfidenciale. Këshilli Mbikëqyrës mund të vendosë për të bërë të njohura publikisht një pjesë ose të gjitha vendimet e tij.
Rregullorja e funksionimit të Këshillit Mbikëqyrës parashikon se Këshilli vendos mbi projektvendimet e paraqitura për shqyrtim në mbledhje. Për çdo projekt të paraqitur duhet të marrë vendim më vete. Votimi është i hapur. Në rast barazie vote, kryetari i mbledhjes ka votën përcaktuese.
Anëtarët e Këshillit Mbikëqyrës të pranishëm në mbledhje duhet të votojnë vetëm “pro” ose “kundër”.
Referenca:
Ligji 8269/1997 “Për Bankën e Shqipërisë”, i ndryshuar (neni 50)
Statuti i Bankës së Shqipërisë Miratuar me vendimin e Këshillit Mbikëqyrës të Bankës së Shqipërisë 90/2015.
Kodi i Procedurave Administrative