NJOFTIM PËR SHTYP
Fjala e Guvernatorit të Bankës së Shqipërisë, z. Ardian Fullani, në ceremoninë e dekorimit nga Presidenti Italian, z. Giorgio Napolitano

Shkëlqesia Juaj, zoti Ambasador Iannucci,
Të nderuar zotërinj ministra,
Të nderuar deputetë,
Shkëlqesi Ambasadorë,
Të nderuar kolegë, miq, dashamirës dhe të ftuar!

Jam më shumë se i nderuar për vlerësimin që më bëhet sot.

Natyrisht çdo njeri pret të vlerësohet një ditë në punën e tij. Momente vlerësimi nuk kanë munguar në karrierën time, por, asnjëherë nuk kisha menduar se një komb tjetër do të më nderonte me besimin e tij.
Në jetën time pak herë jam ndjerë kaq i emocionuar dhe kaq i motivuar.

Megjithatë, do të përpiqem që në fjalë të thjeshta të shpreh mirënjohjen e thellë dhe nderimin e lartë që kam, për Presidentin e Republikës Italiane, shkëlqesinë e tij, zotin Napolitano.

Të jem njëri prej të zgjedhurve, që prej 6 dekadash nderohen me Yllin e Solidaritetit Italian, nga presidentët e shquar të Italisë, djepit të qytetërimit evropian, më bën të ndjehem krenar dhe tërësisht i obliguar në përkushtimin tim.

Megjithë emocionet e këtij momenti, nga thellësia e zemrës time vjen një falenderim i veçantë për Ministrin e Jashtëm të Italisë, zotin D'Alema, dhe për diplomatin e shquar dhe mikun e Shqipërisë, zotin Januci.
Natyrisht me të, unë ndaj prej kohësh përpjekje dhe arritje në zhvillimin e sistemit bankar dhe të ekonomisë shqiptare.

Në një ditë si kjo, dua të falenderoj të gjithë ata që me bashkëpunimin, mbështetjen dhe praninë e tyre në karrierën time, më kanë shtuar besimin në sukses. Një vend i veçantë, sigurisht i takon familjes time, e cila me dashuri dhe durim, më është ndodhur pranë, në ditë të mira dhe të vështira.

Mendoj se për të gjithë miqtë, kolegët, të afërmit e mi, të pranishëm ose jo në këtë holl, ky është një moment i shënuar. Unë jam i lumtur, që këtë ngjarje të madhe në jetën time ta ndaj me ju.

Ambasador Iannucci,

Duke pranuar me mirënjohje këtë dekoratë, dua t'Ju siguroj, se puna dhe përpjekjet e mija, në drejtim të thellimit të bashkëpunimit dhe solidarizimit me vendin mik Italinë, do të jenë të vazhdueshme.

Nuk është e tepërt të them, që të forcosh miqësinë, respektin reciprok, mirënjohjen dhe mirëkuptimin njerëzor midis popujve është në vetvete një mision fisnik. Në këto momente më kujtohet një fjalë e urtë: "Miqësia për njerëzimin është si dielli për lulet. I ushqen vazhdimisht tek i shikon si lulëzojnë".

Në filozofinë e lashtë, të pranuarit e nderimit nga një komb i shquar, të fisnikëron.
Unë e pranoj këtë vlerësim me mirënjohje dhe respekt të thellë për Presidentin e Republikës së Italisë dhe popullin italian.

Amicitiae nostrae memoriam spero sempiternam fore - I hope that the memory of our friendship will be everlasting. (Cicero)