BANKA E SHQIPËRISË

NJOFTIM PËR SHTYP
Java e Parasë “Tepër i ri për të folur me lekë të vjetër”

Data e publikimit: 03.04.2019

 

Java e Parasë është një festë mbarëbotërore e parasë, e cila ka për qëllim ndërgjegjësimin e brezit të ri për të qenë qytetarë të ardhshëm të përgjegjshëm dhe të aftë për të marrë vendime financiare të mirëmenduara.

Banka e Shqipërisë, në bashkëpunim me Shoqatën Shqiptare të Bankave dhe mbështetjen e Ministrisë së Arsimit, Sportit dhe Rinisë, si shumë institucione të tjera në mbarë globin organizojnë aktivitete të larmishme për t’i përfshirë fëmijët dhe të rinjtë, duke u mësuar si të kujdesen për paratë, si të kursejnë, si të mendojnë financiarisht apo si t’i kuptojnë ndryshimet në sistemet ekonomike ku jetojnë, si të fitojnë të ardhura nëpërmjet sipërmarrjes dhe të vendosin bazat për të ardhmen e tyre nëpërmjet kulturës financiare.

Këtë vit, Java e Parasë në Shqipëri u zhvillua në datat 25- 31 mars 2019, nën moton “Tepër i ri për të folur me lekë të vjetër”. Në aktivitetet e kësaj Jave morën pjesë rreth 4.000 nxënës dhe studentë, nga më shumë se 90 shkolla të të gjitha niveleve.