BANKA E SHQIPËRISË

NJOFTIM PËR SHTYP
Mbi nënshkrimin e marrëveshjes së bashkëpunimit midis Bankës së Shqipërisë dhe Sekretariatit të Shtetit Zviceran për Çështjet Ekonomike (SECO)

Data e publikimit: 22.10.2013

 

Në datën 18 tetor 2013, Banka e Shqipërisë nënshkroi një marrëveshje bashkëpunimi me Sekretariatin e Shtetit Zviceran për Çështjet Ekonomike (SECO). Marrëveshja u nënshkrua nga Guvernatori i Bankës së Shqipërisë, z. Ardian Fullani, dhe zj. Beatrice Maser, Ambasadore, Drejtore e Bashkëpunimit Ekonomik dhe Zhvillimit në SECO, gjatë punimeve të konferencës me temë “Krijimi i Kuadrit të Politikës Monetare: Cili është Roli për Konsiderimin e Sektorit Financiar?”.

bcc1 6054 0

Konferenca i zhvilloi punimet në datat 17-18 tetor 2013, në Gjenevë të Zvicrës, dhe kishte si qëllim shkëmbimin e përvojës dhe punimeve kërkimore të ekspertëve të bankave qendrore të programit, akademikëve dhe politikbërësve nga institucione të tjera. Pjesë e punimeve ishte dhe programi i asistencës dypalëshe dhe ndërtimi i kapaciteteve për bankat qendrore. Në këtë konferencë, Guvernatori i Bankës së Shqipërisë, z. Ardian Fullani, dha kontributin e tij si folës në panelin e tretë: “Përballimi i krizave dhe kohët e pazakonshme”.

Nënshkrimi i marrëveshjes me SECO-n i mundëson Shqipërisë të bëhet pjesë e programit mbi asistencën dypalëshe dhe ndërtimin e kapaciteteve për bankat qendrore. Qëllimi i këtij programi është ofrimi i mbështetjes teknike në përmirësimin e cilësisë së parashikimit të inflacionit dhe politikbërjes monetare, nxitjen e zhvillimit të tregjeve efikase financiare, si dhe zhvillimin e një sistemi efektiv të administrimit të burimeve njerëzore. Marrëveshja do të ketë një shtrirje kohore prej 3 vitesh, përkatësisht 2013-2016.

Sekretariati i Shtetit për Çështjet Ekonomike është qendra e ekspertizës së qeverisë federale të Zvicrës, e cila shqyrton të gjitha problemet kryesore që lidhen me politikat ekonomike. Qëllimi i tij është sigurimi i rritjes së qëndrueshme ekonomike, duke mundësuar kushtet e nevojshme për politikat rregullatore dhe ekonomike. Që prej vitit 1992, SECO, bazuar në kërkesat në rritje për asistencë teknike në fushën e bankingut qendror, ka mbështetur bankat qendrore të vendeve partnere, nëpërmjet një bashkëpunimi strategjik me Institutin e Studimeve për Zhvillime Ndërkombëtare (Graduate Institute of International and Development Studies). Bashkëpunimi me disa banka qendrore konsiston, përgjithësisht, në shërbime të përgjithshme këshilluese dhe aktivitete specifike të përshtatura sipas vendit, në formën e Asistencës Teknike dhe të Programeve të Trajnimit (TATPs).