Fondi për Ndërhyrjen e Jashtëzakonshme

Fondi i ndërhyrjes së jashtëzakonshme u krijua më 10 janar 2018 në zbatim të ligjit 133/2016 "Për rimëkëmbjen dhe ndërhyrjen e jashtëzakonshme në banka, në Republikën e Shqipërisë". Fondi duhet të plotësohet gradualisht dhe të arrijë nivelin 0.5% të detyrimeve të të gjitha bankave, brenda datës 11 korrik të vitit 2027.

Për të përmbushur nivelin e synuar të fondit, sektori bankar paguan çdo vit një kontribut vjetor, në përpjesëtim me vitet që mbeten deri në 2027.

1vasi

Banka e Shqipërisë përllogarit çdo vit kontributin vjetor që paguan sektori bankar për plotësimin e Fondit të Ndërhyrjes së Jashtëzakonshme.

Përllogaritja e kontributit vjetor për plotësimin e Fondit të Ndërhyrjes së Jashtëzakonshme bëhet sipas formulës të përcaktuar në rregulloren e Fondit.
 

Krijimi i Fondit të Ndërhyrjes së Jashtëzakonshme

  • Për vitin e parë, përllogaritja e nivelit të synuar, nivelit vjetor të Fondit dhe kontributit vjetor për çdo bankë, bazohet në pasqyrat financiare të vitit 2016.
  • Deri në 10 janar 2018, bankat duhet të kenë derdhur në Fond 10% të kontributit vjetor.  
  • Deri në 30 prill 2018, bankat duhet të derdhin pjesën e mbetur prej 90% të kontributit të vitit të parë.

Banka e Shqipërisë mund të përdorë mjetet financiare të Fondit gjatë zbatimit të ndërhyrjes së jashtëzakonshme për qëllimet e mëposhtme:

  1. për të garantuar aktivet ose pasivet e bankës në ndërhyrje të jashtëzakonshme, filialeve të saj, bankës urë apo të një shoqërie për administrimin e aktiveve;
  2. për t'i dhënë likuiditet bankës në ndërhyrje të jashtëzakonshme, filialeve të saj, një banke urë apo një shoqërie për administrimin e aktiveve;
  3. për të blerë aktivet e bankës në ndërhyrje t jashtëzakonshme;
  4. për të kontribuar në kapital dhe për të siguruar fondet e tjera të nevojshme për një bankë urë apo një shoqëri për administrimin e aktiveve;
  5. për t'i paguar kompensim aksionarëve ose kreditorëve;
  6. për t'i kompensuar bankës në ndërhyrje të jashtëzakonshme humbjet e pambuluara që lindin për shkak të përjashtimit të detyrimeve të pranuara të kreditorëve, të caktuara nga zbatimi i instrumentit të rikapitalizimit nga brenda;
  7. për të ndërmarrë ndonjë kombinim të veprimeve të përmendura në shkronjat "a" deri në "f";
  8. për të paguar kostot e arsyeshme të pësuara nga Autoriteti i Ndërhyrjes së Jashtëzakonshme në lidhje me zbatimin e instrumenteve apo kompetencave të ndërhyrjes së jashtëzakonshme, nëse nuk bëhet kompensimi;
  9. për mbulimin e shpenzimeve për administrimin e Fondit të ndërhyrjes së jashtëzakonshme;
  10. për shlyerjen e detyrimeve dhe huave të marra për plotësimin e fondit;
  11. për çdo pagesë dëmshpërblimi, sipas vendimit administrativ ose gjyqësor të formës së prerë.

Fondi i Ndërhyrjes së Jashtëzakonshme administrohet nga Agjencia e Sigurimit të Depozitave (ASD).
Banka e Shqipërisë si Autoriteti i Ndërhyrjes së Jashtëzakonshme miraton përdorimin e Fondit, ndërsa ASD-ja përcakton mënyrën e investimit dhe instrumentet ku mund të investohen fondet e vëna në dispozicion të "Fondit të ndërhyrjes së jashtëzakonshme", sipas politikës së miratuar nga Banka e Shqipërisë.

  • Niveli i synuar i "Fondit të ndërhyrjes së jashtëzakonshme" i llogaritur me të dhënat e bilanceve të audituara të sektorit bankar në dhjetor 2016, është  6,324,246,425.44 lekë.
  • Niveli vjetor i "Fondit të ndërhyrjes së jashtëzakonshme" për vitin e parë të kontributit, është 632,424,642.54 lekë dhe shpërndahet proporcionalisht sipas peshës së secilës bankë në detyrimet e sektorit bankar, të llogaritur si diferencë midis aktiveve dhe kapitalit rregullator.

Për të vizituar faqen e vjetër të internetit, klikoni këtu