BANKA E SHQIPËRISË
NJOFTIM PËR SHTYP
Ekspozitë “Berati në shek. XVIII-XX: Zhvillimi ekonomik dhe tregtar, koleksione të kartëmonedhave lokale të qytetit, objekte me rëndësi historike të Beratit të pasqyruara në monedhën kombëtare”
Data e publikimit: 19.04.2024
Më 18 dhe 19 prill 2024, Muzeu i Bankës së Shqipërisë dhe Qendra Kombëtare e Muzeumeve, Berat, organizuan ekspozitën e përbashkët fotografike “Berati në shek. XVIII-XX: Zhvillimi ekonomik dhe tregtar, koleksione të kartëmonedhave lokale të qytetit, objekte me rëndësi historike të qytetit të pasqyruara në monedhën kombëtare”, në ambientet e Muzeut Ikonografik “Onufri”, në Berat.
Në ceremoninë e hapjes së ekspozitës, z. Altin Tanku, Drejtor i Departamentit të Kërkimeve pranë Bankës së Shqipërisë, së bashku me drejtorin e Qendrës Muzeore Berat, z. Miklor Pasku, përshëndetën të pranishmit. Z. Tanku shpjegoi se si kjo ekspozitë nxjerr në pah rolin e rëndësishëm të Beratit, si një qendër e ekonomisë në nivel kombëtar. Si një vlerësim i rolit të tij në ekonomi, histori e trashëgimi kulturore, Berati është përzgjedhur për të qenë pjesë e simbolikës së monedhës tonë kombëtare të qarkullimit, por edhe të asaj numizmatike. Një vëmendje të veçantë ekspozita i kushtoi Kodikut të Purpurt të Beratit, si dokumenti historik më i vjetër që ruhet sot në Shqipëri. Qoftë i parë si objekt kulture, qoftë si trashëgimi e gjallë e kultivimit të krishtërimit në vendin tonë, ky kodik përmban vlera të përveçme që jo vetëm lidhin të tashmen me të shkuarën, por që përbëjnë edhe vetë fillin e vazhdimësisë kulturore të shqiptarëve ndër shekuj. Në vitin 2005, Kodiku i Purpurt i Beratit nr. 1 u bë pjesë e regjistrit “Kujtesa e Botës” të UNESCO-s. Këtë objekt të vyer të trashëgimisë sonë, Banka e Shqipërisë e nderoi në vitin 2011 përmes monedhës numizmatike përkujtimore, 50 Lekë “Kodiku i Purpurt i Beratit 043 Φ – Beratinus 1”.
Ekspozita - e kuruar me shumë kujdes nga të dy institucionet - trajtoi aspektet më të spikatura të zhvillimeve tregtare, ekonomike dhe etnografike të qytetit të Beratit, gjatë shekujve XVIII-XX dhe koleksione numizmatike, si kartëmonedhat lokale të fillimit të shekullit XX, monedha kombëtare, të cilat mbartin imazhe të monumenteve dhe objekteve të qytetit, me vlera historike dhe kulturore universale.
Vizitorët u njohën me karakteristikat kryesore të qytetit të Beratit, si një nga qendrat më të rëndësishme të ekonomisë shqiptare në shek. XVIII- XX. Përmes “udhëtimit” në këtë ekspozitë, vizitorët u njohën me ndërthurjen unike mes historisë ekonomike dhe zhvillimit tregtar të qytetit, si dhe me disa tema të tjera që mbeten aktuale për ekonominë edhe në ditët e sotme. Një hapësirë të veçantë në këtë Ekspozitë zunë edhe elemente të edukimit financiar të Bankës së Shqipërisë.
Ekspozita u vizitua edhe nga zj. Bora Muzhaqi, Ministër Shteti për Rininë dhe Fëmijët, e cila duke u ndalur në këndin edukativ të ekspozitës, theksoi rëndësinë e rolit të Bankës Qendrore dhe institucioneve shtetërore për edukimin financiar të brezit të ri, si dhe inkurajoi nxënësit që të mësojnë mbi financat, duke e bërë kulturën financiare pjesë të formimit të tyre të përgjithshëm. Ajo u shpreh se bashkërendimi i përpjekjeve ndërinstitucionale në këtë fushë është domosdoshmëri për rritjen e kulturës financiare në vend.