NJOFTIM PËR SHTYP
Guvernatori Sejko merr pjesë në ceremoninë e listimit të titullit të parë jo-qeveritar në bursë

Në datën 5 korrik 2023, Guvernatori i Bankës së Shqipërisë, z. Gent Sejko, mori pjesë në ceremoninë e organizuar nga Bursa Shqiptare e Titujve (ALSE) me rastin e listimit të titullit të parë joqeveritar në bursë.

Në këtë aktivitet merrnin pjesë Ministrja e Financave dhe Ekonomisë, zj. Delina Ibrahimaj, Kryetari i Autoritetit të Mbikëqyrjes Financiare, z. Ervin Mete, Drejtori i Përgjithshëm i Bankës Amerikane të Investimeve, z. Andi Ballta, Drejtoresha e Përgjithshme e institucionit financiar NOA, zj. Heriola Spahiu, Drejtoresha e Përgjithshme e ALSE, zj. Nada Vokshi si dhe përfaqësues nga bankat e nivelit të dytë, nga kompanitë e sigurimit, nga komuniteti i biznesit, si dhe përfaqësues nga qeveria shqiptare.

Në fjalën e tij mbajtur me këtë rast, Guvernatori Sejko theksoi rëndësinë e listimit të titullit të parë joqeveritar në bursë e cila vjen si rezultat i një punë dhjetëvjeçare të disa institucioneve si: Ministria e Financave dhe Ekonomisë, Autoriteti i Mbikëqyrjes Financiare dhe Banka e Shqipërisë si dhe falë ideatorëve të ndërtimit të një burse shqiptare të titujve, aksionarëve të saj Bankës Credins, Bankës Amerikane të Investimeve dhe AK-Invest.

Në krye të fjalës së tij, Guvernatori Sejko vuri në dukje përfitimet që ka ekonomia nga zhvillimi i tregut të kapitalit si: përmirësimi i financimeve afatgjata të kompanive; ndikimi në uljen e ekspozimit të vendit ndaj ndërprerjes së papritur të kapitalit të huaj; përftimit të asistencës në drejtim të thellimit të tregut financiar dhe rritjes së efikasitetit të shpërndarjes së kapitalit në ekonomi. Paralelisht, nëpërmjet investimeve të jorezidentëve, ajo ndihmon në sigurimin e likuiditetit si dhe në shpërndarjen gjeografike të rrezikut; përmirëson më tej stabilitetin financiar të vendit, ndikon në rritjen e shkallës së formalizimit të ekonomisë, në rritjen e transparencës financiare të bizneseve si dhe përmirësimon imazhin e tyre; rrit shkallën e mbikëqyrjes së tregut, si dhe përmirëson praktikat e mirëqeverisjes së vetë kompanive të listuara.

Më tej Guvernatori Sejko u ndal edhe në masat e ndërmarra nga Banka e Shqipërisë që shërbejnë për krijimin e infrastrukturës së nevojshme për tregtimin dhe regjistrimin elektronik të shkëmbimit të titujve. Në këtë kontekst, ai përmendi punën e bërë për përmirësimin e sistemeve të pagesave dhe krijimin e institucioneve depozitare, përfshirë këtu edhe ato private. Gjithashtu, ndër të tjera, Guvernatori Sejko përmendi punën e Bankës së Shqipërisë në drejtim të nxitjes së tregut sekondar të titujve qeveritarë për ta shndërruar atë në një treg më likuid, të aftë për të amortizuar ndikimin e goditjeve të primit të rrezikut të likuiditetit.

Bursa në vetvete është një institucion që mbart një rëndësi të veçantë në tregun e kapitaleve, ku shkëmbimet e titujve në bursë përbëjnë një tregues të rëndësishëm të shëndetit financiar të një kompanie në veçanti dhe të ekonomisë së vendit në përgjithësi.

Në përfundim të fjalës së tij, Guvernatori Sejko u ndaj dhe në sfidat e së ardhmes për zhvillimin e mëtejshëm të tregjeve të kapitaleve. Në këtë drejtim, miratimi i Dokumentit Politik “Për krijimin e një Mjedisi Mundësues për Zhvillimin e Tregjeve të Kapitalit në Shqipëri, 2023-2027” shihet si një hap cilësor në zhvillimin e tregjeve të kapitalit. Një projekt i rëndësishëm i ndërmarrë nga Banka e Shqipërisë që synon identifikimin e nevojave për ndryshimet në aktet ligjore që rregullojnë veprimtarinë në tregjet financiare pritet të realizohet në të ardhmen në bashkëpunim me EBRD, AMF dhe Ministrinë e Ekonomisë dhe Financave.