BANKA E SHQIPËRISË
NJOFTIM PËR SHTYP
Mbi vizitën e Guvernatorit të Bankës së Shqipërisë, z. Ardian Fullani në Bankën Kombëtare të Polonisë
Data e publikimit: 14.04.2006
Në datë 13 prill 2006, Guvernatori i Bankës së Shqipërisë, z. Ardian Fullani, u takua me homologun e tij, Presidentin e Bankës Kombëtare të Polonisë, z. Leszek Balcerowicz.
Për herë të parë, me ftesë të Presidentit të Bankës Kombëtare të Polonisë, Guvernatori Fullani prezantoi përpara anëtarëve të Komitetit të Politikës Monetare dhe Këshillit Drejtues të kësaj banke, regjimin e politikës monetare që zbatohet në Shqipëri, zhvillimet më të fundit në ekonominë tonë në qendër të të cilave ishin përpjekjet e Bankës së Shqipërisë për të mbajtur nën kontroll inflacionin. Në vazhdim, zoti Fullani parashtroi edhe disa ide në lidhje me ardhmërinë e politikës monetare në Shqipëri. Në përfundim, Guvernatori Fullani, iu përgjigj interesimit të anëtarëve të Komitetit të Politikës Monetare, si dhe mirëpriti mendimet dhe sugjerimet e tyre mbi politikën tonë monetare.
Ndërsa, takimi i përbashkët midis dy drejtuesve u fokusua në fushat specifike ku do të përqendrohet bashkëpunimi dypalësh në të ardhmen. Ky bashkëpunim do t'i ofrojë Bankës së Shqipërisë përvojën e Bankës Kombëtare të Polonisë në procesin e integrimit evropian, si dhe asistencë mbi fusha specifike si mbikëqyrja bankare dhe politika monetare.
Në përfundim të vizitës, Guvernatori Fullani i shprehu Presidentit Balcerowicz, falenderimet e tij për mikpritjen e ngrohtë, si dhe vlerësoi bashkëpunimin e mirë midis Bankës së Shqipërisë dhe Bankës Kombëtare të Polonisë.