NJOFTIM PËR SHTYP
Mbi vizitën e Guvernatorit të Bankës së Shqipërisë, z. Ardian Fullani, pranë Bankës së Greqisë

Në datën 19 korrik 2010, Guvernatori, z. Ardian Fullani, në krye të një delegacioni të Bankës së Shqipërisë, zhvilloi një vizitë pune në Bankën e Greqisë. Kjo vizitë u realizua në kuadër të bashkëpunimit të vazhdueshëm midis Bankës së Shqipërisë dhe Bankës së Greqisë, duke vijuar praktikën e konsoliduar tashmë të shkëmbimit periodik të informacionit, analizave dhe vlerësimeve mbi çështje të ndryshme ekonomike dhe financiare me interes të ndërsjellë. Ky proces është pjesë e Memorandumeve të Mirëkuptimit të nënshkruara midis institucioneve respektive në funksion të koordinimit të masave e politikave mbikëqyrëse dhe rregullatore.

Gjatë këtyre takimeve, Guvernatori Fullani dhe Guvernatori Provopoulos diskutuan mbi zhvillimet e fundit ekonomike dhe financiare në Shqipëri e Greqi, aspektet e përbashkëta dhe veçantitë dalluese të tyre në të dy vendet, si dhe ecurinë e pritshme të këtyre zhvillimeve në të ardhmen. Të dy guvernatorët ndanë mendimin se politikat ekonomike dhe masat strukturore të ndërmarra kohët e fundit do të ndihmojnë në zhvillimin e qëndrueshëm dhe afatgjatë të ekonomive respektive. Sipas tyre, e rëndësishme është monitorimi i kujdesshëm i aktivitetit ekonomik dhe vlerësimi i vazhdueshëm i përshtatshmërisë së politikave ekonomike kundrejt tyre.

Në veçanti, vëmendje e veçantë gjatë kësaj vizite iu kushtua shkëmbimit të informacionit dhe të opinioneve mbi ecurinë e grupeve bankare e financiare që operojnë në dy vendet tona. Guvernatori Fullani dhe Guvernatori Provopoulos ndanë të njëjtin opinion mbi rëndësinë që ka ky proces në bashkërendimin e politikave mbikëqyrëse e rregullatore, në interes të forcimit të stabilitetit dhe rritjes së eficiencës së sistemeve financiare respektive. Ata theksuan gjithashtu se shkëmbimet e vazhdueshme financiare ishin në interesin e ndërsjelltë të të dy vendeve dhe, si të tilla, ato duhet të mirëpriten dhe të inkurajohen edhe më tej. Rritja e shkëmbimeve financiare lehtësohet më tej nga fakti se grupet bankare e financiare të cilat operojnë njëkohësisht në të dy vendet tona karakterizohen nga tregues të kënaqshëm dhe në përmirësim të likuiditetit e kapitalizimit.

Në përfundim të vizitës, të dy Guvernatorët ranë dakord që këto takime të vijojnë me kontakte të vazhdueshme në nivel teknik e vendimmarrës midis Bankës së Shqipërisë dhe Bankës së Greqisë.