NJOFTIM PËR SHTYP
Mbledhja e Këshillit Mbikëqyrës të Bankës së Shqipërisë të datës 28 dhjetor 2004

Këshilli Mbikëqyrës i Bankës së Shqipërisë, në mbledhjen e datës 28 dhjetor 2004, pasi shqyrtoi propozimet e Departamentit të Politikës Monetare dhe propozimet e disa departamenteve të tjera të Bankës së Shqipërisë, vendosi të miratojë:

1. Raportin e Politikës Monetare për muajin nëntor të vitit 2004

Mbi zhvillimet kryesore të muajit:

• Inflacioni vjetor shënoi 2.2 për qind në muajin nëntor duke qenë brenda objektivit të Bankës së Shqipërisë. Inflacioni mesatar vjetor ishte 3.0 për qind. Inflacioni mujor në muajin nëntor ishte 0.5 për qind
• Kontributi kryesor në normën vjetore të inflacionit është dhënë nga grupi "qira, ujë dhe lëndë djegëse", ndërkohë që indeksi i grupit "ushqime dhe pije joalkolike" është shfaqur në rënie në krahasim me një vit më parë, duke ushtruar presion për uljen e nivelit të përgjithshëm të çmimeve
• Rritja e çmimit ndërkombëtar të naftës, e reflektuar në rritjen e inflacionit vjetor të grupit "transport" nuk ka ndikuar dukshëm në inflacionin e përgjithshëm, kryesisht si pasojë e mbiçmimit vjetor të lekut kundrejt dollarit amerikan dhe euros
• Banka e Shqipërisë ka mbajtur të pandryshuar nivelin e normës bazë të interesit, në pritje të reagimit të bankave ndaj uljes së fundit të kryer në datën 11 nëntor. Ajo ka vazhduar të tërheqë likuiditetin e tepërt të sistemit me anë të ankandeve të repove
• Norma vjetore e rritjes së ofertës monetare në muajin tetor rezultoi 9.7 për qind, duke shënuar një rënie të lehtë në krahasim me muajin e kaluar. Agregati M2 është rritur ngadalë si rezultat i kërkesës së ulët të qeverisë për para
• Pozicioni valutor i sistemit bankar është përmirësuar gjatë muajit tetor. Gjatë këtij muaji është shënuar një rritje prej 20.1 milionë dollarësh në nivelin e mjeteve valutore neto
• Deficiti buxhetor i krijuar gjatë muajit tetor është mbuluar pothuajse tërësisht nga financimi i brendshëm, i cili ka qenë rreth 1.9 miliardë lekë
• Teprica e kredisë, në fund të muajit tetor të vitit 2004, arriti në 63.1 miliardë lekë, duke shënuar një rritje mujore prej 2.2 miliardë lekësh. Ekonomia shqiptare për periudhën dhjetor 2003 - tetor 2004 është kredituar me 12.4 miliardë lekë, duke përbërë rreth 76 për qind të nivelit të parashikuar në programin monetar për vitin 2004
• Tendenca e lekut për nënçmim ndaj euros dhe mbiçmim ndaj dollarit është vërejtur edhe gjatë periudhës tetor - nëntor 2004. Gjatë periudhës tetor - nëntor 2004 leku është nënçmuar mesatarisht me 1.8 për qind kundrejt euros dhe është mbiçmuar mesatarisht me 4.1 për qind kundrejt dollarit

Raporti i plotë i politikës monetare për muajin nëntor do të publikohet në Buletinin Zyrtar dhe në faqen e internetit të Bankës së Shqipërisë.

2. Shtesën e disa veprimtarive të lejuara për Bankën "Raiffeisen"

Në mbështetje të nenit 26 të ligjit "Për bankat në Republikën e Shqipërisë", Bankës "Raiffeisen" i shtohen dhe veprimtaritë e mëposhtëme :

• këmbimin e valutave duke përfshirë kontratat e së ardhmes (future) për këmbime valutore
• shërbime besimi (trust), përfshirë, pa kufizim, investimin dhe administrimin e fondeve të besuara ( fiduciare)
• shërbime si administruese e portofolit të investimit ose të këshilltarit për investimet
• shërbime për nënshkrimin dhe për shpërndarjen e letrave me vlerë të borxhit dhe të pronësisë, si dhe tregtimin e letrave me vlerë të pronësisë për llogari të saj ose të klientëve, sipas kufizimeve të parashikuara në nenin 33 të ligjit nr.8365, datë 02.07.1998 "Për bankat në Republiken e Shqipërisë"

3. Në këtë mbledhje Këshilli Mbikëqyrës i Bankës së Shqipërisë, miratoi dhe "Dokumentin e Politikës Monetare dhe Programin Monetar për vitin 2005", "Buxhetin dhe Planin e Investimeve të Bankës së Shqipërisë për vitin 2005", si dhe "Kalendarin e zhvillimit të mbledhjeve të Këshillit Mbikëqyrës të Bankës së Shqipërisë për vitin 2005".

KALENDARI I MBLEDHJEVE TË KËSHILLIT MBIKËQYRËS TË BANKËS SË SHQIPËRISË PËR VITIN 2005