NJOFTIM PËR SHTYP
Vendimmarrja e Këshillit Mbikëqyrës në mbledhjen e datës 23 mars 2023

Në mbledhjen e datës 23 mars 2023, Këshilli Mbikëqyrës i Bankës së Shqipërisë vendosi që norma bazë e interesit të rritet në nivelin 3.00%, norma e depozitës njëditore të rritet në nivelin 2.00% dhe norma e kredisë njëditorë të rritet në nivelin 4.00%. Përveç këtij vendimi, Këshilli Mbikëqyrës shqyrtoi dhe vendosi për:

• Miratimin e pasqyrave financiare të Bankës së Shqipërisë për vitin 2022

Pasqyrat financiare të Bankës së Shqipërisë për vitin 2022 janë hartuar në përputhje me standardet ndërkombëtare të raportimit financiar (SNRF). Këto pasqyra janë audituar nga Ernst & Young - Ekspertë Kontabël të Autorizuar, Dega në Shqipëri, dhe së bashku me raportin e audituesit të pavarur, janë pjesë e Raportit Vjetor të Bankës së Shqipërisë për vitin 2022.

Në mbyllje të vitit 2022, totali i aktiveve të Bankës së Shqipërisë është rreth 732 miliardë lekë. Peshën kryesore në totalin e aktiveve e zënë investimet në tituj të borxhit me rreth 62% si dhe balancat me banka, pjesë e rezervës valutore të Bankës së Shqipërisë, me rreth 12%.

• Miratimin e rregullores “Për ushtrimin e veprimtarisë dhe mbikëqyrjen e institucioneve të pagesave”.

Kjo rregullore përcakton kërkesat e autoritetit mbikëqyrës për ushtrimin e veprimtarisë dhe  mbikëqyrjen e institucioneve të pagesave. Ajo vjen si një plotësim i kuadrit rregullativ të Bankës së Shqipërisë në zbatim të kërkesave të ligjit 55/2020 “Për shërbimet e pagesave”.

Këshilli Mbikëqyrës u njoh dhe me informacione të tjera të lidhura me veprimtarinë e përditshme funksionale dhe operacionale të Bankës së Shqipërisë.