BANKA E SHQIPËRISË
NJOFTIM PËR SHTYP
Vizitë zyrtare e ish-Guvernatorit të Bankës Kombëtare të Zvicrës
Data e publikimit: 14.09.2010
Në datën 13 shtator 2010, me ftesë të Guvernatorit të Bankës së Shqipërisë, z. Ardian Fullani, ish-Guvernatori i Bankës Kombëtare të Zvicrës, z. Jean-Pierre Roth zhvilloi një vizitë zyrtare në Shqipëri.
Në kuadër të kësaj vizite z. Roth mbajti një leksion me temë Zvicra: Shteti i vogël, ishull i parasë. Leksioni u zhvillua në hollin e Bankës së Shqipërisë, ku merrnin pjesë përfaqësues të saj e drejtues të bankave tregtare.
Ndër të tjera, z. Roth paraqiti dhe një panoramë të ecurisë së ekonomisë zvicerane. Edhe pse gjeografikisht ndodhet thuajse në qendër të Evropës, Zvicra ka ruajtur monedhën e saj dhe pavarësinë e normave të interesit. Qëndrueshmëria dhe siguria e mjedisit ekonomik të vendit, ka mundësuar lulëzimin e sektorit bankar.
Duke falënderuar z. Roth për prezantimin e shkëlqyer, Guvernatori Fullani vlerësoi ekonominë zvicerane të jashtëzakonshme, e cila ndërvite ka arritur të ndërtojë një stabilitet të admirueshëm. Pavarësisht se mund të duket e largët, eksperienca zviceriane është një model i suksesshëm i cili duhet ndjekur nga ekonomitë e vogla që aspirojnë të jene të orientuara drejt eksporteve.
Banka Kombëtare Zvicerane shërben si banka qendrore e vendit dhe është themeluar në vitin 1907.
Z. Jean-Pierre Roth e filloi punën në Bankën Kombëtare të Zvicrës nëvitin 1979 dhe për një periudhë 15 vjeçare punoi në sektorë të ndryshëm të degëve të saj, në Bernë dhe Zyrih. Nga 1 Janari 2001, ai u emërua kryetar i Bordit drejtues dhe drejtues i Departamentit kryesor të Bankës Kombëtare të Zvicrës (përkatësisht përfshinte: Divizionin e Marrëdhënieve Ndërkombëtare, Divizionin Ekonomik, Ligjor dhe Administrativ) në Zyrih. Gjithashtu, z. Roth ka qenë Guvernator i Bankës Kombëtare të Zvicrës pranë FMN-së dhe në 1 mars të vitit 2006, u morri mandatin 3 vjeçar si kryetar i Bordit Drejtues së Bankës për Rregullime Ndërkombëtare në Bazel.