NJOFTIM PËR SHTYP
Zhvillohet faza finale e konkursit "Vlera e vërtetë e parasë"për vitin shkollor 2008-2009

Banka e Shqipërisë, në zbatim të programit të edukimit “Banka qendrore në jetën e përditshme”, ka zhvilluar me nxënësit e shkollave të mesme konkursin “Vlera e vërtetë e parasë”. Konkursi, është një prej aktiviteteve të përfshira në Memorandumin e Bashkëpunimit, të nënshkruar midis Ministrisë së Arsimit dhe Bankës së Shqipërisë në datën 13 dhjetor 2007, i cili synon të zgjerojë njohuritë e nxënësve rreth rolit të bankës qendrore në ekonominë e vendit si dhe të rrisë zhvillimin e kulturës ekonomike të vendit.

Konkursi u zhvillua në sallën e Akademisë së Arteve në Tiranë, ku pjesëmarrës ishin 5 shkollat fituese në rang rrethi: shkolla “Tirana Jonë” – Tiranë, shkolla “Themistokli Gërmenji – Korçë, shkolla “28 nëntori”- Shkodër, shkolla “Ali Demi” – Vlorë, shkolla “Siri Shapllo” – Gjirokastër. Ky konkurs u ndoq nga nxënës, mësues, përfaqësues të Drejtorisë Arsimore të rrethit si dhe familjarët e pjesëmarrësve. I pranishëm në këtë konkurs ishte edhe Ministri i Arsimit dhe Shkencës, z. Myqerem Tafaj, i cili përgëzoi Bankën e Shqipërisë për ndërmarrjen e një iniciative të tillë, e cila ka mjaft vlera për brezin e ri shqiptar.

Në hapjen e konkursit, Guvernatori Fullani u shpreh se: “ ...Megjithëse çështjet që kanë lidhje me financat në dukje nuk përbëjnë rëndësi për grupmoshën tuaj, do të vijë një ditë që do t’ju duhet të administroni buxhetin tuaj dhe të familjes së ardhshme, apo të kurseni para për të investuar në të mira si shkollimi universitar dhe pasuniversitar, një makinë e re ose një shtëpi. Duke analizuar ecurinë e krizës në të gjithë botën, kuptojmë se sa e rëndësishme është për individët të kenë një kulturë të plotë ekonomiko-financiare qysh në moshë të re, për t’u përgatitur të jetojnë dhe veprojnë në një treg financiar që është gjithnjë në ndryshim dhe zhvillim. Për këtë arsye, ashtu siç e kam thënë edhe në takime të tjera me të rinjtë, ne në BSH jemi “iniciatorë” të krijimit të një kulture ekonomiko-financiare që në ciklin e ulët të sistemit arsimor”.

Fituesja e fazës finale të konkursit u shpall shkolla e mesme “Themistokli Gërmenji” nga qyteti i Korçës. Për shkollën fituese, Banka e Shqipërisë ndau çmimin prej 100.000 lekësh, për secilin nga tre nxënësit e skuadrës fituese, çmim të cilin ata mund ta përdorin pasi të mbushin moshën 18 vjeç si një mbështetje financiare për studimet universitare.

Në përfundim të konkursit, Guvernatori i Bankës së Shqipërisë, z. Ardian Fullani, në cilësinë e Kryetarit të Jurisë, përgëzoi nxënësit dhe mësuesit e shkollave pjesëmarrëse si dhe Drejtoritë Arsimore të rretheve për mbështetjen që ata dhanë për realizimin e suksesshëm të këtij aktiviteti.