BANKA E SHQIPËRISË
NJOFTIM PËR SHTYP
Çelet Java Globale e Parasë
Data e publikimit: 14.03.2016
Në datë 14 mars 2016, në ambientet përpara Bankës së Shqipërisë, u çel Java Globale e Parasë për vitin 2016, e cila do të zhvillohet në datat 14-20 mars 2016.
Gjatë kësaj jave, Banka e Shqipërisë, në bashkëpunim me Shoqatën Shqiptare të Bankave, Ministrinë e Arsimit dhe Sportit dhe Ministrinë e Mirëqenies Sociale dhe Rinisë, do të organizojnë aktivitete edukative dhe ndërgjegjësuese për fëmijë dhe të rinj si: seminare, leksione, konkurse shkollore dhe televizive, vizita në Muzeun e Bankës së Shqipërisë, vizita në banka tregtare, si dhe orë të hapura mësimore.
Në aktivitetin çelës të Javës Globale të Parasë 2016 qenë të pranishëm Guvernatori i Bankës së Shqipërisë, z. Gent Sejko, Ministrja e Arsimit dhe Sportit, zj. Lindita Nikolla, Ministri i Mirëqenies Sociale dhe Rinisë, z. Blendi Klosi dhe Zëvendëskryetari i Shoqatës Shqiptare të Bankave, z. Gazmend Kadriu.
Në fjalën e tij përshëndetëse, Guvernatori Sejko theksoi rëndësinë e edukimit ekonomik dhe financiar të brezit të ri, i cili ndihmon fëmijët dhe të rinjtë të ndërgjegjësohen mbi të drejtat e tyre financiare, lehtëson aksesin në shërbimet financiare dhe zhvillon aftësitë në këtë fushë. Ai nënvizoi gjithashtu edhe angazhimin serioz të Bankës së Shqipërisë në edukimin financiar, përmes zbatimit të programeve edukative dhe hartimit të teksteve mësimore dedikuar arsimit fillor dhe atij të mesëm. Roli edukativ i institucionit është rritur më tej nëpërmjet çeljes së Muzeut të Bankës së Shqipërisë, ku vizitorët e vegjël dhe të rinj përveç përftimit të informacionit numizmatik dhe historik, mund të mësojnë dhe të edukohen mbi financat dhe miradministrimin e tyre. Aktiviteti i parë i Javës iu dedikua fëmijëve. Në hapësirën pranë ndërtesës së Bankës së Shqipërisë në Tiranë u zhvilluan veprimtari artistike dhe lojëra edukuese përmes të cilave synohet të ushqehet tek fëmijët ndjenja e kujdesit për paranë, dëshira për të kryer llogari të thjeshta dhe nevoja për kursim si mjet për të përmbushur detyrimet dhe dëshirat e përditshme dhe ato afatgjata. |