NJOFTIM PËR SHTYP
Takimi i dytë i nivelit të lartë në kuadër të Memorandumit të Mirëkuptimit për Remitancat ndërmjet Bankës së Shqipërisë, Ministrit të Shtetit për Diasporën dhe Ministrisë së Financave dhe Ekonomisë

Më 14 dhjetor 2018, në ambientet e Bankës së Shqipërisë, u zhvillua takimi i dytë i nivelit të lartë midis Bankës së Shqipërisë, Ministrit të Shtetit për Diasporën, bankave tregtare dhe subjekteve financiare jobanka të angazhuara në fushën e transfertave monetare që operojnë në vendin tonë.

Ky takim zhvillohet në kuadër të Memorandumit të Mirëkuptimit “Për Remitancat” të nënshkruar vitin e kaluar nga Banka e Shqipërisë, Ministri i Shtetit për Diasporën dhe Ministria e Financave dhe Ekonomisë.

Qëllimi i takimit është diskutimi mbi zhvillimet e arritura përgjatë vitit të parë pas nënshkrimit të Memorandumit, si dhe synimet dhe nevojat për ndërhyrje të përbashkëta në të ardhmen, për përfshirjen e diasporës dhe emigracionit në zhvillimin ekonomik dhe mirëqenien e vendit.

Takimi u çel me fjalët përshëndetëse të Guvernatorit të Bankës së Shqipërisë, z. Gent Sejko, dhe Ministrit të Shtetit për Diasporën, z. Pandeli Majko.

Gjatë fjalës së tij, Guvernatori Sejko theksoi rëndësinë e remitancave në ekonominë shqiptare, në mirëqenien e familjeve dhe zhvillimin në përgjithësi. Ai u shpreh se gjatë vitit 2018, Banka e Shqipërisë, përmes burimeve të saj, është angazhuar seriozisht në krijimin e parakushteve të nevojshme për kanalizimin sa më efikas të këtyre të ardhurave në ekonominë shqiptare.

Në vijim, Guvernatori Sejko shtoi se duke iu referuar nismave ndërkombëtare në fushën e remitancave, evidentohet rëndësia e reduktimit të kostove dhe rritja e efikasitetit të shërbimeve për dërgesat. Ai nënvizoi se, gjatë këtij viti, Banka e Shqipërisë ka ndërmarrë një sërë projektesh për analizimin e tregut vendas, me qëllim identifikimin dhe adresimin e nevojave për ndërhyrje.

Në përfundim të fjalës së tij, Guvernatori Sejko u shpreh se në të ardhmen, Banka e Shqipërisë do të vijojë me zhvillimin e mëtejshëm të kuadrit ligjor dhe përmirësimet infrastrukturore, të cilat mbështesin përfshirjen financiare e reduktojnë kostot e përdorimit të këtyre instrumenteve, si dhe shprehu besimin se përpjekjet e të gjithë aktorëve do të vijojnë  me të njëjtat ritme për përfshirjen sa më të shpejtë e të gjerë në ekonominë e vendit, të këtij faktori mjaft me rëndësi si remitancat.

Më tej, takimi vijoi punimet në nivel teknik, ku të pranishmit patën mundësi të diskutojnë lidhur me angazhimet dhe nismat e së ardhmes.

• Fjala e Guvernatorit të Bankës së Shqipërisë, z. Gent Sejko
• Fjala e Ministrit të Shtetit për Diasporën, z. Pandeli Majko