Në datën 20 mars 2023, në ambientet e Bankës së Shqipërisë, u çel Java e Parasë për vitin 2023. Kjo Javë është një festë mbarëbotërore e parasë që ka për qëllim ndërgjegjësimin e  fëmijëve dhe të rinjve për të qenë qytetarë të ardhshëm të përgjegjshëm dhe të aftë për të marrë vendime financiare të mirëmenduara.
Gjatë javës 20-26 mars 2023, Banka e Shqipërisë, në bashkëpunim me Shoqatën Shqiptare të Bankave dhe mbështetjen e Ministrisë së Arsimit dhe Sportit, organizojnë aktivitete të larmishme për fëmijët dhe të rinjtë. Në thelb të këtyre aktiviteteve qëndron edukimi financiar, më konkretisht: si të kujdesen për paratë, si të kursejnë, si të mendojnë financiarisht. Këto do të realizohen nëpërmjet pjesëmarrjes së tyre në leksione, konkurse, vizita në Muzeun e Bankës së Shqipërisë dhe orë të hapura mësimore.

Aktivitetin çelës të Javës së Parasë 2023 e përshëndetën z. Gent Sejko, Guvernatori i Bankës së Shqipërisë, zj. Evis Kushi, Ministre e Arsimit dhe Sportit dhe z. Bledar Shella, Kryetar i Shoqatës Shqiptare të Bankave. Më tej, aktiviteti vijoi me ceremoninë e ndarjes së çmimeve për fituesit 5 konkurseve të para të organizuara nga Banka e Shqipërisë dhe Shoqata Shqiptare e Bankave me rastin e Javës së Parasë.

 

Në konkursin “Vizatimi më i mirë” morën pjesë 350 nxënës së klasave të treta nga 75 shkolla 9-vjeçare të vendit.

 

Në konkursin “Projekti më i mirë me temë "Administro paratë e tua, kultivo të ardhmen tënde"” u paraqitën 46 projekte, të realizuara nga rreth 1140 nxënës të 38 shkollave 9-vjeçare të vendit.

 

Në konkursin “Fotomontazhi më i mirë me temë "Administro paratë e tua, kultivo të ardhmen tënde"” u paraqitën 61 fotomontazhe, të realizuara nga nxënës të 32 shkollave 9-vjeçare të vendit.

 

Në konkursin “Videoja më e mirë me temë "Administro paratë e tua, kultivo të ardhmen tënde" u paraqitën 69 video, të realizuara nga 97 nxënës të 47 shkollave të mesme të vendit.

 

Në konkursin e esesë më të mirë me temë “Ndryshimet klimatike - përse janë të rëndësishme për sektorin financiar në Shqipëri?” (Dega e Ekonomiksit/ Financë-Bankë), u paraqitën 11 punime, të realizuara nga studentë të 7 universiteteve publike dhe jopublike.

 

Gjatë ditëve të Javës së Parasë, ekspertë të Bankës së Shqipërisë mbajtën leksione të hapura për studentët e disa universiteteve të vendit, duke përcjellë ekspertizën e tyre mbi tema të lidhura me financën dhe bankingun qendror. Këto leksione u dhanë mundësinë studentëve të diskutonin rreth çështjeve të momentit, por edhe të zgjeronin njohuritë mbi çështje të trajtuara gjatë studimeve të tyre. 
 

Leksion i hapur në Universitetin " Luigj Gurakuqi", Shkodër, me temë “Ndryshimi klimatik dhe rëndësia e tij për bankën qendrore”, nga PhD. Margerita Topalli, Departamenti i Kërkimeve, Banka e Shqipërisë.

Leksion i hapur në Universitetin "Aleksandër Moisiu”, Durrës, me temë “Inflacioni në  rritje – impakti mbi ekonominë në kushtet e rreziqeve te shtuara", nga Dr. Fiqiri Baholli, Departamenti i Kërkimeve, Banka e Shqipërisë. 
 

Leksion i hapur në Universitetin "Aleksandër Xhuvani", Elbasan, me temë “Njohja e funksionit të Auditimit të Brendshëm në institucionet financiare”, nga Ledia Canga, Departamenti i Kontrollit, Banka e Shqipërisë.

 

Gjatë Javës së Parasë 2023, ekspertë të Bankës së Shqipërisë vizituan disa gjimnaze të 3 qytete të ndryshme të vendit, me qëllim mbajtjen e orëve të hapura mësimore për nxënësit gjimnazistë, me temë: “Të njohim paranë tonë! As i vjetër e as i ri, jam thjesht LEK!”. Prezantimet i njohën nxënësit me historinë e krijimit të bankës qendrore në vendin tonë dhe atë të monedhës tonë zyrtare, si dhe trajtoi fenomenin e gabuar të komunikimit me Lekë të vjetër apo të rinj. Ky aktivitet u zhvillua në shkollat: Kolegji “Turgut Ozal”, Durrës dhe Gjimnazi “28 Nëntori”, Shkodër.

 

Gjatë Javës së Parasë 2023, ekspertë të Bankës së Shqipërisë vizituan disa shkolla 9-vjeçare të Tiranës me qëllim mbajtjen e orëve mësimore për nxënësit e klasave V, me temë: “Administro paratë e tua, kultivo të ardhmen tënde!”. Ky aktivitet përfshiu shkollat 9-vjeçare: “Fan Noli”, Shkolla Mëzez Fushë, Shkolla “Kongresi i Manastirit”, Shkolla Farka e Vogël, Shkolla “Lidhja e Prizrenit”, Shkolla “Bashkim Fino”, Shkolla “Klodian Tanushi”, Shkolla “Kosova”, dhe Shkolla “Androkli Kostallari”.

 

 

Në Kuizin Evropian të Parasë u regjistruan 926 nxënës të grup moshës 13-15 vjeç nga 89 shkolla nga i gjithë vendi (34 nga Tirana dhe 55 nga rrethet). Konkursi u realizua online dhe u ndoq me interes të lartë nga më tepër se 1,700 shikues. Pjesëmarrësit konkurruan në platformën online Kahoot!, të organizuar në 463 ekipe.