BANKA E SHQIPËRISË
CV-të dhe pagat e nënpunësve që janë subjekt deklarimi sipas ligjit, përfshirë dhe anëtarët e kabinetit të titullarit të BSH, përshkrim të procedurës së zgjedhjes, kompetencat dhe detyrat e tyre
Data e publikimit: 23.06.2021
Në vijim parashtrohen parashikimet ligjore mbi procedurën e zgjedhjes dhe kompetencat/detyrat e titullarëve të institucionit:
Kushtetuta e Republikës së Shqipërisë, në nenin 161, paragrafi i fundit i tij parashikon mënyrën e drejtimit të Bankës së Shqipërisë dhe mandatin e Guvernatorit.
“Banka e Shqipërisë drejtohet nga një këshill, i cili kryesohet nga Guvernatori. Guvernatori zgjidhet nga Kuvendi me propozim të Presidentit të Republikës për 7 vjet, me të drejtë rizgjedhjeje.”
Gjithashtu ligji 8269/1997 “Për Bankën e Shqipërisë”, i ndryshuar (si më poshtë referuar për thjeshtësi si ligji për Bankën), në nenin 44 të tij përcakton përbërjen e Këshillit Mbikëqyrës dhe përzgjedhjen e anëtarëve të këtij Këshilli, i cili ka në përbërje dhe titullarë të institucionit, konkretisht Guvernatorin, Zëvendësguvernatorin e Parë dhe Zëvendësguvernatorin e Dytë.
Emërimi i drejtuesve të njësive të Bankës së Shqipërisë kryhet nga Këshilli Mbikëqyrës, mbështetur në parashikimin e nenit 43, shkronja “h” të ligjit për Bankën e Shqipërisë:
“Këshilli Mbikëqyrës ka kompetencë….të miratojë emërimet e drejtuesve të departamenteve në Bankën e Shqipërisë, të përcaktojë në përgjithësi kushtet e marrëdhënieve të punësimit në Bankën e Shqipërisë të agjentëve dhe korrespondentëve të Bankës së Shqipërisë.”
Kompetencat kryesore të organeve drejtuese dhe titullarëve përcaktohen në nenin 43 dhe 53 të ligjit për Bankën e Shqipërisë, si dhe në nenet 10, 11, 12 të “Statutit të Bankës së Shqipërisë”, të miratuar me vendim të Këshillit Mbikëqyrës të Bankës së Shqipërisë 90/2015.
Ligji për Bankën dhe Statuti i Bankës së Shqipërisë mund të lexohen nëpërmjet dy linqeve në vijim:
Legjislacioni përfshin tërësinë e akteve ligjore dhe nënligjore që rregullojnë veprimtarinë dhe funksionimin e Bankës së Shqipërisë dhe të subjekteve që licencohen dhe rregullohen prej saj.